پاکستان اور بنگلہ دیش کے درمیان کھیلے جا رہے دوسرے ٹیسٹ میچ میں قومی ٹیم پہلی اننگز میں 232 رنز بنا کر آؤٹ ہوگئی، جبکہ دوسرے روز کے اختتام تک میزبان ٹیم نے 3 وکٹوں کے نقصان پر 110 رنز بنا لیے اور اسے دوسری اننگز میں 156 رنز کی مجموعی برتری حاصل ہو گئی ہے۔
پاکستان کی اننگز کا آغاز اور ابتدائی نقصان
پاکستان نے دوسرے روز اپنی نامکمل اننگز 21 رنز بغیر کسی نقصان کے دوبارہ شروع کی، تاہم اوپننگ جوڑی زیادہ دیر مزاحمت نہ کر سکی۔ اذان اویس 13 اور عبداللہ شفیق 9 رنز بنا کر آؤٹ ہوئے۔
پاکستان کی تیسری وکٹ 61 رنز پر گری جب کپتان شان مسعود 21 رنز بنا کر پویلین لوٹے۔ اس کے بعد سعود شکیل 8 رنز بنا کر آؤٹ ہوئے اور اسکور 79 تک پہنچا۔
بابر اعظم نے 68 رنز کی ذمہ دارانہ اننگز کھیلی تاہم وہ ٹیم کا مجموعی اسکور 142 پر ہونے پر آؤٹ ہوئے۔ اس کے بعد سلمان علی آغا 21 رنز بنا کر آؤٹ ہوئے اور پاکستان کی پانچویں وکٹ 150 رنز پر گری۔
پاکستان کی ساتویں وکٹ 174 رنز پر گری جب محمد رضوان 13 رنز بنا کر آؤٹ ہوئے۔ حسن علی 16 رنز کے ساتھ 184 کے مجموعے پر آؤٹ ہوئے۔
خرم شہزاد 10 رنز بنا کر 207 کے اسکور پر آؤٹ ہوئے جبکہ آخری وکٹ ساجد خان کی صورت میں 232 رنز پر گری۔ انہوں نے 38 رنز کی جارحانہ اننگز کھیلی۔
بنگلہ دیش کی جانب سے ناہید رانا اور تیج الاسلام نے 3، 3 وکٹیں حاصل کیں، جبکہ تسکین احمد اور مہدی حسن میراز نے 2، 2 کھلاڑیوں کو آؤٹ کیا۔
میچ کے پہلے روز بنگلہ دیش نے اپنی پہلی اننگز میں 278 رنز بنائے اور ٹیم آل آؤٹ ہوئی تھی۔
