لاہور ہائیکورٹ میں پنجاب بھر کے تعلیمی اداروں میں 3 ماہ کی موسمِ گرما کی تعطیلات دینے کے خلاف دائر درخواست پر سماعت ہوئی۔ عدالت نے فریقین کو نوٹسز جاری کرتے ہوئے جواب طلب کر لیا، جبکہ کیس کی سماعت غیر معینہ مدت تک ملتوی کر دی گئی۔
جسٹس خالد اسحاق نے آل پاکستان پرائیویٹ اسکولز ایسوسی ایشن کی درخواست پر سماعت کی۔ درخواست میں پنجاب حکومت، محکمہ اسکول ایجوکیشن سمیت دیگر اداروں کو فریق بنایا گیا ہے۔
یہ بھی پڑھیے پنجاب میں موسم گرما کی تعطیلات کب سے ہوں گی؟ تفصیلات سامنے آگئیں
درخواست گزار کے وکیل نے مؤقف اختیار کیا کہ پنجاب حکومت نے موسمِ گرما کی تعطیلات کے لیے تعلیمی ادارے 3 ماہ تک بند رکھنے کا نوٹیفکیشن جاری کیا ہے، جس سے طلبہ کی تعلیم شدید متاثر ہوگی۔
درخواست میں کہا گیا کہ پاکستان میں تعلیمی سال کم ہو کر صرف 120 دن رہ گیا ہے، جبکہ امریکا اور انگلینڈ سمیت ترقی یافتہ ممالک میں تعلیمی سال تقریباً 230 دن پر مشتمل ہوتا ہے۔
درخواست گزار کے مطابق 3 ماہ تک تعلیمی ادارے بند رکھنے سے تعلیمی نظام مزید متاثر ہوگا، جبکہ تعلیم کے بغیر کوئی بھی معاشرہ ترقی کی راہ پر گامزن نہیں ہو سکتا۔
یہ بھی پڑھیے پنجاب کے بعد سندھ حکومت نے بھی موسم گرما کی تعطیلات کا اعلان کردیا
درخواست میں عدالت سے استدعا کی گئی کہ 3 ماہ کی تعطیلات سے متعلق جاری نوٹیفکیشن کو کالعدم قرار دیا جائے اور موسمِ گرما کی تعطیلات کا دورانیہ کم کر کے 6 سے 8 ہفتے مقرر کرنے کا حکم دیا جائے۔
