وفاقی دارالحکومت اسلام آباد کے سرکاری اسکولوں اور کالجوں میں 25 مئی سے موسمِ گرما کی تعطیلات شروع ہوں گی جو 31 جولائی 2026 تک جاری رہیں گی۔ وفاقی نظامتِ تعلیم کے مطابق تعلیمی ادارے 3 اگست کو دوبارہ کھلیں گے، جبکہ تعطیلات کے دوران طلبہ اور اساتذہ کے لیے مختلف تعلیمی سرگرمیوں کا بھی اہتمام کیا جائے گا۔
ایف ڈی ای کی جانب سے جاری نوٹیفکیشن کے مطابق وفاقی دارالحکومت کے تمام سرکاری تعلیمی اداروں میں تعطیلات 25 مئی سے شروع ہوں گی، جبکہ اسکول اور کالج 3 اگست 2026 کو دوبارہ کھولے جائیں گے۔
نوٹیفکیشن میں بتایا گیا ہے کہ 15 جون سے دو ہفتوں پر مشتمل ’سمر فیسٹا‘ کا بھی انعقاد کیا جائے گا، جس کے تحت مختلف تعلیمی اور تفریحی سرگرمیاں منعقد ہوں گی۔
اعلامیے کے مطابق نویں اور دسویں جماعت کے طلبہ کا نصاب بروقت مکمل کرانے کے لیے جون یا جولائی میں ہر ادارے میں خصوصی کوچنگ کلاسز کا انعقاد کیا جائے گا، جن کے لیے ضرورت کے مطابق تدریسی عملہ تعینات کیا جائے گا۔
نوٹیفکیشن میں کہا گیا ہے کہ یہ کلاسز ڈیجیٹل ہب سے منسلک کلاس رومز کے ذریعے بھی منعقد کی جاسکتی ہیں، جہاں جون میں براہِ راست اور جولائی میں ریکارڈ شدہ لیکچرز فراہم کیے جائیں گے۔
اعلامیے کے مطابق انڈرگریجویٹ پروگرامز، بشمول بی ایس اور اے ڈی پی کلاسز، اپنے مقررہ تعلیمی شیڈول اور سمسٹر کیلنڈر کے مطابق جاری رہیں گی۔
ایف ڈی ای نے مزید بتایا کہ گرمیوں کی تعطیلات کے دوران اساتذہ کی تربیتی نشستوں کا بھی اہتمام کیا جائے گا، جبکہ تعلیمی اداروں میں مرمت، دیکھ بھال اور اسٹاک چیکنگ کے امور بھی اسی دوران انجام دیے جائیں گے۔
