مبینہ کوکین کوئین انمول عرف پنکی کو جمعہ کے روز منشیات کے متعدد مقدمات اور ایک قتل کیس میں 14 روزہ جوڈیشل ریمانڈ پر جیل بھیج دیا گیا۔
انمول کو رواں ماہ کے آغاز میں کراچی سے 2 مقدمات میں گرفتار کیا گیا تھا، جن کا تعلق منشیات رکھنے اور بغیر لائسنس اسلحہ رکھنے سے تھا۔
گرفتاری سے قبل بھی اس کے خلاف کئی فوجداری مقدمات درج تھے، جبکہ اس کے خلاف فعال مقدمات کی تعداد ایک درجن سے تجاوز کر چکی ہے۔
یہ بھی پڑھیں: ’مجھے لاہور سے گرفتار کرکے یہاں لائے ہیں‘، انمول پنکی کی عدالت میں دہائی
جمعہ کے روز انمول کو سخت سیکیورٹی میں سینٹرل جیل کے جوڈیشل کمپلیکس لایا گیا۔
جسمانی ریمانڈ مکمل ہونے پر اسے بغدادی، اسپیشلائزڈ انویسٹی گیشن یونٹ، گزری اور درخشاں تھانوں میں درج مقدمات کے سلسلے میں متعلقہ جوڈیشل مجسٹریٹس کے روبرو پیش کیا گیا۔
جمعہ کو انمول کے خلاف ایک منشیات کیس، ایک قتل کیس اور 10 پرانے منشیات مقدمات میں جسمانی ریمانڈ کی مدت مکمل ہوئی۔
مزید پڑھیں: کوکین کوئین انمول پنکی کن تھانوں کے اہلکاروں کو رشوت دیتی رہی؟ تفتیشی رپورٹ نے سنسنی پھیلا دی
تمام مقدمات میں استغاثہ نے ملزمہ کے مزید جسمانی ریمانڈ کی درخواست کی، تاہم عدالت نے اسے تمام مقدمات میں جوڈیشل ریمانڈ پر جیل بھیجنے کا حکم دے دیا۔
عدالت نے تفتیشی افسران کوتحقیقات مکمل کرکے چالان عدالت میں پیش کرنے کی ہدایت کی۔
اس سے قبل جنوبی ضلع کے سیشن جج نے درخشاں، گزری، گارڈن اور ڈیفنس پولیس کی جانب سے انمول کو جوڈیشل کمپلیکس میں پیش کرنے کی درخواستیں منظور کی تھیں۔
