نیشنل ڈیزاسٹر مینجمنٹ اتھارٹی (این ڈی ایم اے) نے ملک کے شمالی علاقوں میں 26 سے 31 مئی کے دوران گلیشیئر جھیلوں کے پھٹنے، لینڈ سلائیڈنگ اور شدید بارشوں کے باعث ممکنہ خطرات سے خبردار کیا ہے۔
یہ بھی پڑھیں:ملک کے مختلف علاقوں میں بارش اور ژالہ باری کا امکان، این ڈی ایم اے نے الرٹ جاری کردیا
عرب نیوز کے مطابق درجہ حرارت میں اضافے اور گلیشیئرز کے تیزی سے پگھلنے کے باعث شمالی علاقوں میں پانی کے بہاؤ میں اضافہ اور خطرناک صورتحال پیدا ہو سکتی ہے۔
ادارے نے گلگت بلتستان، بالائی خیبر پختونخوا اور آزاد کشمیر کو سب سے زیادہ حساس قرار دیتے ہوئے لینڈ سلائیڈنگ اور سڑکوں کی بندش کا خدشہ ظاہر کیا ہے۔
حکام کے مطابق شگر، سکردو، دیوسائی، ناران اور قراقرم ہائی وے سمیت متعدد اہم شاہراہیں متاثر ہو سکتی ہیں، جبکہ ہنزہ، دیامر، استور، نیلم ویلی اور دیگر علاقوں میں سیلابی صورتحال کا امکان ہے۔
این ڈی ایم اے نے سیاحوں کو ہدایت کی ہے کہ شمالی علاقوں کا سفر کرنے سے پہلے موسم اور سڑکوں کی صورتحال ضرور چیک کریں اور احتیاطی تدابیر اختیار کریں۔
یہ بھی پڑھیں:بھارت نے سلال ڈیم کھول دیا، دریائے چناب میں سیلاب کا خطرہ، الرٹ جاری
ادارے کا کہنا ہے کہ 26 سے 31 مئی کے دوران خیبر پختونخوا، پنجاب، گلگت بلتستان، آزاد کشمیر، بلوچستان اور سندھ کے مختلف علاقوں میں بھی بارشوں، آندھی اور ممکنہ ژالہ باری کا سلسلہ جاری رہ سکتا ہے۔
پاکستان کو موسمیاتی تبدیلیوں سے شدید خطرات لاحق ہیں اور ہر سال شدید بارشیں، سیلاب اور دیگر قدرتی آفات بڑے پیمانے پر نقصان کا باعث بنتی ہیں۔
