امریکی صدر ڈونلڈ ٹرمپ نے ایران کے ساتھ ممکنہ معاہدے پر تنقید کرنے والے سیاسی مخالفین کو شدید تنقید کا نشانہ بناتے ہوئے کہا ہے کہ وہ ان لوگوں پر ہنستے ہیں جو بغیر حقائق جانے رائے دے رہے ہیں۔
سوشل میڈیا پر اپنے ایک بیان میں ڈونلڈ ٹرمپ نے کہاکہ ڈیموکریٹس، بعض ریپبلکن رہنما اور دیگر ناقدین کو اس ممکنہ معاہدے کی حقیقت کا علم ہی نہیں کیونکہ ابھی مذاکرات مکمل بھی نہیں ہوئے۔
انہوں نے اپنے مخالفین کو کمزور اور غیر مؤثر سیاستدان قرار دیتے ہوئے تنقید کا نشانہ بنایا۔
ڈونلڈ ٹرمپ نے کہاکہ یہ سیاستدان مسلسل ان کی ہر کامیابی پر تنقید کرتے ہیں جبکہ خود ناکام پالیسیوں اور کمزور قیادت کی علامت بن چکے ہیں۔
انہوں نے ڈیموکریٹک پارٹی پر بھی کڑی تنقید کرتے ہوئے کہاکہ پارٹی نے غلط پالیسیوں اور خراب امیدواروں کی حمایت کرکے اپنی سمت کھو دی ہے۔
ایران کے ساتھ ممکنہ معاہدے کے حوالے سے ٹرمپ نے کہاکہ اگر کوئی معاہدہ ہوا تو وہ بہترین اور بامعنی ہوگا، بصورت دیگر کوئی معاہدہ نہیں کیا جائے گا۔
انہوں نے سابق صدر باراک اوباما کے دور میں ہونے والے جوہری معاہدے کو تباہ کن معاہدہ قرار دیتے ہوئے دعویٰ کیاکہ اس نے ایران کو ایٹمی ہتھیار حاصل کرنے کا راستہ دیا تھا۔
ڈونلڈ ٹرمپ نے زور دے کر کہاکہ وہ اوباما انتظامیہ جیسا معاہدہ کبھی نہیں کریں گے۔
واضح رہے کہ امریکا اور ایران ممکنہ طور پر ابتدائی معاہدے کے قریب پہنچ چکے ہیں، جس میں پاکستان نے بھرپور سفارتی کردار ادا کیا ہے۔
