استحکام پاکستان پارٹی کے ترجمان فیاض الحسن چوہان نے جمعیت علمائے اسلام (ف) کے سربراہ مولانا فضل الرحمان کے حالیہ بیان پر سخت ردعمل دیتے ہوئے کہا ہے کہ مولانا فضل الرحمان نے پوری تاریخِ اسلام کے شہدا کی تضحیک کی ہے۔
مزید پڑھیں:شہدا کی قربانیوں کو تنخواہ یا مراعات سے نہیں تولا جا سکتا، شہدا پر سیاست نہیں ہونی چاہیے، حنیف عباسی
اسلام آباد میں پریس کانفرنس کرتے ہوئے فیاض الحسن چوہان نے کہا کہ پاک فوج کے جوان تنخواہ یا پیسے کے لیے نہیں بلکہ وطن، قوم اور اپنے نظریے کے دفاع کے لیے جانوں کا نذرانہ پیش کرتے ہیں۔
انہوں نے کہا کہ شہدا اور غازیوں کی قربانیوں کو تنخواہ سے جوڑنا پوری قوم کے جذبات کو مجروح کرنے کے مترادف ہے۔
انہوں نے کہا کہ پاکستان کو غیر مستحکم کرنے کے لیے بھارت کی جانب سے سازشیں کی جا رہی ہیں، جبکہ سرحدوں پر تعینات سکیورٹی فورسز دشمن کے عزائم ناکام بنانے کے لیے مسلسل قربانیاں دے رہی ہیں۔
مولانا فضل الرحمان صاحب! آپ نے نبی پاکﷺ اور خلفائے راشدین سے لے کر آج تک مسلمانوں کے تمام شہدا کی تضحیک کی ہے، میں اللہ کے کرم سے ایک لٹریری اور دیوبند خاندان سے ہوں، جس کا ناجائز تاج تم (فضل الرحمان) اپنے سر پر بٹھاکر اپنے پورے خاندان کو پالنے لگے ہو، فیاض الحسن چوہان pic.twitter.com/8KWMdHJTF8
— Sheraz Ahmad Sherazi (@Sherazi_Silmian) July 14, 2026
فیاض الحسن چوہان نے کہا کہ میجر عدنان شہید نے اپنے ساتھی کی جان بچانے کے لیے اپنی جان قربان کی، جبکہ شہید تحسین کے والد نے اپنے بیٹے کی شہادت پر بھی ’پاکستان زندہ باد‘ کا نعرہ لگایا، جو وطن سے محبت اور قربانی کے جذبے کی روشن مثال ہے۔
مزید پڑھیں:’شہادت ہے مطلوب و مقصودِ مومن‘ یہ راز تنخواہ داروں کی سمجھ سے بالاتر ہے، رانا ثنا اللہ خان
انہوں نے کہا کہ تنخواہ سیاست دان، ڈاکٹر اور دیگر تمام پیشہ ور افراد بھی لیتے ہیں، لیکن اس بنیاد پر کسی کی خدمت یا قربانی کی اہمیت کم نہیں ہوتی۔
پریس کانفرنس کے دوران فیاض الحسن چوہان نے مولانا فضل الرحمان پر مزید سیاسی تنقید کرتے ہوئے ان پر مختلف الزامات بھی عائد کیے۔
