برطانیہ کے بادشاہ چارلس کی صحت سے متعلق بڑھتی تشویش کے باعث ان کی ممکنہ تخت برداری سے متعلق قیاس آرائیاں زور پکڑتی جا رہی ہیں جبکہ دوسری جانب ولی عہد ولیم کے حالیہ فیصلوں کو مستقبل کی قیادت کی تیاری سے جوڑا جا رہا ہے۔
یہ بھی پڑھیں: برطانوی شاہی خاندان کی معمر ترین رکن شہزادی کیتھرین انتقال کرگئیں
شاہ چارلس کے کینسر کے علاج اور محدود عوامی مصروفیات کے باعث شاہی مبصرین میں یہ سوال شدت اختیار کر گیا ہے کہ آیا بادشاہ مستقبل قریب میں تخت سے دستبردار ہونے پر غور کر سکتے ہیں۔
برطانوی وکیل اور نشریاتی تجزیہ کار اینڈریو ایبورن نے اس حوالے سے گفتگو کرتے ہوئے کہا کہ ایسی کئی وجوہات موجود ہیں جن کی بنا پر شاہ چارلس اس امکان پر غور کر سکتے ہیں۔
انہوں نے کہا کہ بادشاہ اگرچہ اپنی ذمہ داریاں نبھا رہے ہیں تاہم صحت کے مسائل کے باعث یہ صورتحال ان کے لیے خاصی تھکا دینے والی ہے اور شاہی حلقوں میں اس حوالے سے مختلف منصوبہ بندی زیر غور رہی ہے۔
مزید پڑھیے: برطانوی شاہی خاندان کی باہمی رنجشیں برقرار: پرنس ہیری بڑے بھائی شہزادہ ولیم کو منانے میں ناکام رہے
رپورٹس کے مطابق اگرچہ شاہی محل کی جانب سے کنگ چارلس کی صحت سے متعلق مکمل تفصیلات جاری نہیں کی گئیں تاہم اس سال کے آغاز میں یہ بتایا گیا تھا کہ ان کے کیموتھراپی سیشنز کی تعداد میں کمی کی گئی ہے جسے مثبت پیش رفت قرار دیا گیا تھا۔
دوسری جانب پرنس ولیم کی جانب سے اپنی ڈچی آف کارنوال جائیداد کے ایک بڑے حصے کو فروخت کرکے تقریباً 500 ملین پاؤنڈ عوامی فلاحی منصوبوں میں لگانے کے فیصلے کو شاہی مستقبل کی سمت ایک اہم قدم قرار دیا جا رہا ہے۔
مزید پڑھیں: برطانوی ولی عہد ولیم کی اپنے بھائی ہیری اور ان کے بچوں کا حق جانشینی چھیننے کی کوشش
شاہی امور کی ماہر جینی بانڈ کے مطابق یہ اقدام اس بات کا واضح اشارہ ہے کہ پرنس ولیم روایتی بادشاہت کے بجائے عملی تبدیلیوں پر یقین رکھتے ہیں۔
انہوں نے کہا کہ ولیم رہائش اور ماحولیات کے مسائل کے حل کے لیے عملی اقدامات چاہتے ہیں اور مستقبل میں بادشاہ بننے کے بعد مزید نمایاں اصلاحات متعارف کرا سکتے ہیں۔
یہ بھی پڑھیے: حقیقی زندگی میں طلسماتی کہانی جیسا سماں باندھتی مشہور شاہی شادیاں
ادھر بعض مبصرین کا کہنا ہے کہ کنگ چارلس کی صحت اور شاہی خاندان کو درپیش دیگر تنازعات کے تناظر میں عوامی حلقوں میں یہ آوازیں بھی اٹھ رہی ہیں کہ اقتدار کی منتقلی کا عمل جلد شروع ہونا چاہیے تاکہ پرنس ولیم اور شہزادی کیٹ شاہی ذمہ داریاں سنبھال سکیں۔
