ترجمان محکمہ داخلہ پنجاب کے مطابق عیدالاضحیٰ کے پیش نظر صوبائی حکومت نے اہم اقدام کرتے ہوئے کالعدم اور زیر نگرانی تنظیموں کی فہرست جاری کر دی ہے۔
محکمہ داخلہ نے شہریوں کو ہدایت کی ہے کہ وہ کسی بھی صورت میں کالعدم یا زیر نگرانی تنظیموں اور ان کے ذیلی اداروں کو قربانی کی کھالیں نہ دیں۔
مزید پڑھیں:قربانی کے جانوروں کی کھالیں کہاں جاتی ہیں، ان سے کیا کچھ بنتا ہے؟
انسدادِ دہشتگردی ایکٹ 1997 کے تحت ایسی تنظیموں کی ہر قسم کی معاونت جرم تصور کی جاتی ہے، اور خلاف ورزی کرنے والوں کے خلاف قانونی کارروائی عمل میں لائی جائے گی۔
ترجمان کے مطابق پنجاب میں خیراتی سرگرمیوں کے لیے پنجاب چیریٹی کمیشن سے رجسٹریشن لازمی ہے، جبکہ شہری صرف رجسٹرڈ اداروں کو ہی کھالیں دیں۔ رجسٹرڈ اداروں کی تصدیق ان کے سرٹیفکیٹ پر موجود کیو آر کوڈ کے ذریعے کی جا سکتی ہے۔
مزید بتایا گیا ہے کہ مدارس اور خیراتی تنظیموں کو قربانی کی کھالیں اکٹھی کرنے کے لیے متعلقہ ڈپٹی کمشنرز سے اجازت نامہ حاصل کرنا لازم ہے۔
محکمہ داخلہ نے شہریوں سے اپیل کی ہے کہ وہ اس بات کو یقینی بنائیں کہ ان کی امداد حقیقی مستحقین تک پہنچے اور کسی غیر قانونی یا کالعدم تنظیم کے استعمال میں نہ آئے۔
مزید پڑھیں:پاکستان میں کھالوں کی قیمت میں مسلسل کمی کیوں ہوتی جارہی ہے؟
ترجمان کے مطابق کسی بھی مشکوک سرگرمی یا کالعدم تنظیم کی جانب سے کھالیں اکٹھی کرنے کی اطلاع ٹال فری نمبر 080011111 یا ہیلپ لائن 042-99330399 اور 042-99330162 پر دی جا سکتی ہے۔
