نائب وزیراعظم و وزیر خارجہ اسحاق ڈار نے نیویارک میں چینی وزیر خارجہ وانگ یی سے ملاقات کی، جس میں خطے کی تازہ صورتحال، امن و استحکام کے لیے پاکستان کی سفارتی کوششوں اور پاک چین تعلقات پر تفصیلی تبادلہ خیال کیا گیا۔ چینی وزیر خارجہ نے خطے میں مذاکرات اور سفارتکاری کے فروغ کے لیے پاکستان کے مثبت کردار کو سراہا۔
ملاقات کے دوران دونوں رہنماؤں نے پاکستان کی جانب سے مذاکرات اور سفارتکاری کے ذریعے پائیدار امن کے فروغ کے لیے کی جانے والی کوششوں پر گفتگو کی۔ چینی وزیر خارجہ وانگ یی نے خطے میں تعمیری کردار ادا کرنے پر پاکستان کی کوششوں کو سراہتے ہوئے اس کی حمایت کا اعادہ کیا۔
یہ بھی پڑھیے پاکستان اور چین کا دفاعی تعاون مزید مضبوط بنانے پر اتفاق
دونوں رہنماؤں نے وزیراعظم شہباز شریف اور ان کے وفد کے حالیہ کامیاب دورۂ چین کو بھی یاد کیا اور پاکستان و چین کے درمیان سفارتی تعلقات کے قیام کی 75ویں سالگرہ کے موقع پر دونوں ممالک کی دیرینہ دوستی اور اسٹریٹجک تعاون کو مزید مضبوط بنانے کے عزم کا اظہار کیا۔
اسحاق ڈار نیویارک میں چینی وزیر خارجہ وانگ یی کی دعوت پر اقوام متحدہ کی سلامتی کونسل کے کھلے مباحثے میں شرکت کے لیے موجود ہیں۔ یہ مباحثہ ’بین الاقوامی امن و سلامتی کا تحفظ: اقوام متحدہ کے منشور کے مقاصد اور اصولوں کی پاسداری اور اقوام متحدہ کے مرکزی عالمی نظام کو مضبوط بنانا‘ کے عنوان سے منعقد ہوا۔
یہ اہم اجلاس 26 مئی کو اقوام متحدہ کی سلامتی کونسل کی چینی صدارت کے دوران منعقد کیا گیا۔
