پاکستان اور آسٹریلیا کے درمیان 3 میچوں پر مشتمل ون ڈے انٹرنیشنل سیریز کا آغاز ہفتے کے روز سے راولپنڈی کرکٹ اسٹیڈیم میں ہوگا۔
یہ بھی پڑھیں: پاکستان سیریز سے قبل آسٹریلیا کو دھچکا، کپتان مچل مارش انجری کے باعث باہر
سیریز کا پہلا ون ڈے راولپنڈی کرکٹ اسٹیڈیم میں کھیلا جائے گا جبکہ دوسرا اور تیسرا میچ قذافی اسٹیڈیم میں منعقد ہوگا۔
پاکستانی ٹیم اپنے 1000ویں ون ڈے انٹرنیشنل میچ میں آسٹریلیا کا سامنا کرے گی جو قومی کرکٹ تاریخ کا ایک اہم سنگ میل ہوگا۔
تمام میچز پاکستان کے مقامی وقت کے مطابق سہ پہر ساڑھے 4 بجے شروع ہوں گے۔
مزید پڑھیے: پاکستان کے بھارت کے خلاف میچ کے بائیکاٹ سے متعلق سوال پر آسٹریلوی کپتان نے کیا کہا؟
شاہین شاہ آفریدی پاکستان ٹیم کی قیادت کریں گے جبکہ آسٹریلوی ٹیم کی کپتانی جوش انگلس کریں گے۔
پاکستان اور آسٹریلیا کے درمیان اب تک 111 ون ڈے انٹرنیشنل میچز کھیلے جا چکے ہیں جبکہ پاکستان نے آسٹریلیا کے خلاف آخری 2 ون ڈے سیریز 2-1 سے اپنے نام کی تھیں۔
پاکستان کرکٹ بورڈ پہلی بار پاکستان میں پی سی بی لائیو کے ذریعے میچز کی براہ راست اسٹریمنگ کرے گا جبکہ شائقین پی ٹی وی اسپورٹس پر بھی میچز براہ راست دیکھ سکیں گے۔
عامر سہیل، رمیز راجہ، بازید خان، عروج ممتاز اور گریگ بلیوٹ کمنٹری پینل کا حصہ ہوں گے۔
مزید پڑھیں: ’تمہیں گیند کی حالت بھی دیکھنی چاہیے‘، بین اسٹوکس بال لگنے سے زخمی ہوگئے
کپتان شاہین شاہ آفریدی نے کہا کہ پاکستان کا ایک ہزارواں ون ڈے انٹرنیشنل کھیلنا ٹیم کے لیے ایک خاص لمحہ ہے۔
انہوں نے کہا کہ آسٹریلیا دنیا کی مضبوط ترین ٹیموں میں شامل ہے اور ان کے خلاف مقابلے ہمیشہ سخت ہوتے ہیں۔
شاہین شاہ آفریدی کے مطابق کھلاڑیوں نے ٹریننگ کیمپ میں بھرپور محنت کی ہے اور پوری ٹیم کامیابی کے لیے پرعزم ہے۔
یہ بھی پڑھیے: آسٹریلیا کو بڑا دھچکا، ٹی20 ورلڈ کپ سے قبل ایک اور اہم کھلاڑی ٹیم سے باہر
انہوں نے مزید کہا کہ آسٹریلیا کے خلاف گزشتہ 2 ون ڈے سیریز میں کامیابی سے ٹیم کا اعتماد بلند ہے جبکہ راولپنڈی اور لاہور میں شائقین کی بھرپور سپورٹ ہمیشہ کھلاڑیوں کے لیے حوصلہ افزا ثابت ہوتی ہے۔
