پاکستان اسٹاک ایکسچینج میں پیر کے روز کاروبار کے آغاز پر فروخت کا دباؤ دیکھنے میں آیا، جس کے باعث انڈیکس 800 سے زائد پوائنٹس کی کمی کا شکار ہوگیا۔
صبح 9 بج کر 50 منٹ تک بینچ مارک کے ایس ای 100 انڈیکس 810.10 پوائنٹس یعنی 0.47 فیصد کمی کے بعد 173,152.71 پوائنٹس کی سطح پر ٹریڈ کر رہا تھا۔
یہ بھی پڑھیں: اسٹاک مارکیٹ بلند ترین سطح پر پہنچ کر مندی سے دوچار، کیا معیشت خطرے میں ہے؟
مارکیٹ میں آٹوموبائل اسمبلرز، سیمنٹ، کمرشل بینکوں، آئل اینڈ گیس ایکسپلوریشن کمپنیوں، آئل مارکیٹنگ کمپنیوں اور بجلی پیدا کرنے والے شعبوں میں فروخت کا رجحان نمایاں رہا۔
حبکو، ماری پیٹرولیم، او جی ڈی سی ایل، پاکستان آئل فیلڈز، پاکستان پیٹرولیم لمیٹڈ، حبیب بینک، مسلم کمرشل بینک، میزان بینک، نیشنل بینک اور یونائیٹڈ بینک جیسے انڈیکس پر اثرانداز ہونے والے اہم شیئرز منفی زون میں ٹریڈ کرتے رہے۔
PSX Opened Negative 👇
☀️ KSE 100 opened negative by -622.21 points this morning. Current index is at 173,340.61 points (9:45 AM) pic.twitter.com/cyd1S91y3I— Investify Pakistan (@investifypk) June 1, 2026
یہ کمی ایسے وقت میں سامنے آئی ہے جب گزشتہ ہفتے پاکستان کی اسٹاک مارکیٹ نے شاندار بحالی کا مظاہرہ کیا تھا۔
مشرقِ وسطیٰ میں جغرافیائی سیاسی کشیدگی میں کمی اور ملکی معاشی اشاریوں میں بہتری نے سرمایہ کاروں کے اعتماد کو تقویت دی تھی۔
جس کے نتیجے میں تعطیلات کے باعث مختصر کاروباری ہفتے کے دوران کے ایس ای-100 انڈیکس میں تقریباً 4 فیصد اضافہ ریکارڈ کیا گیا تھا۔
مزید پڑھیں: عالمی معیشت میں بہتری: اسٹاک مارکیٹ اور سونے چاندی میں سرمایہ کاری کب کی جائے؟
گزشتہ ہفتے انڈیکس 6,119 پوائنٹس کے اضافے کے ساتھ 173,963 پوائنٹس پر بند ہوا تھا۔
بین الاقوامی مارکیٹوں میں پیر کے روز ایشیائی حصص بازاروں میں مجموعی طور پر استحکام دیکھا گیا۔
مصنوعی ذہانت اور سیمی کنڈکٹرز سے متعلق شعبوں میں سرمایہ کاری کے بڑھتے ہوئے رجحان نے مارکیٹوں کو سہارا دیا، تاہم خلیجی خطے میں امن مذاکرات میں پیش رفت نہ ہونے
سے سرمایہ کار محتاط رہے۔
واشنگٹن اور تہران کے درمیان ممکنہ معاہدے کے لیے مذاکرات جاری ہیں، تاہم امریکی صدر ڈونلڈ ٹرمپ نے اس حوالے سے کوئی واضح پیش رفت بیان نہیں کی۔
دوسری جانب امریکی وزیر دفاع پیٹ ہیگستھ نے ہفتے کے روز کہا کہ اگر معاہدہ طے نہ پایا تو امریکا ایران کے خلاف حملے دوبارہ شروع کرنے کے لیے تیار ہے۔
مزید پڑھیں: امریکی حملہ مؤخر، پاکستان اسٹاک ایکسچینج میں زبردست تیزی
خطے میں کشیدگی اس وقت مزید بڑھی جب اسرائیل نے ایران کی حمایت یافتہ حزب اللہ کے خلاف کارروائیوں کے سلسلے میں لبنان کے اندر مزید پیش قدمی کی۔
علاقائی غیر یقینی صورتحال کے باعث برینٹ خام تیل کی قیمت 1.9 فیصد اضافے کے بعد 92.89 ڈالر فی بیرل تک پہنچ گئی، جبکہ امریکی خام تیل 2.4 فیصد اضافے کے ساتھ 89.46 ڈالر فی
بیرل پر ٹریڈ کرتا رہا۔
