آزاد جموں و کشمیر کی پارلیمانی سیاست میں ایک بہت بڑی اور اہم پیش رفت سامنے آئی ہے، جہاں وزیراعظم آزاد کشمیر چوہدری فیصل ممتاز راٹھور نے آج زرداری ہاؤس اسلام آباد میں پارلیمانی پارٹی کا ایک انتہائی اہم اور ہنگامی اجلاس طلب کرلیا ہے۔
ذرائع کے مطابق یہ اہم اجلاس آج شام 6 بجے منعقد ہوگا، جس میں شرکت کے لیے پاکستان پیپلز پارٹی آزاد کشمیر کی مکمل پارلیمانی پارٹی اسلام آباد پہنچ چکی ہے۔
یہ بھی پڑھیں: مضبوط اور مستحکم پاکستان کشمیر کی آزادی کے لیے ناگزیر ہے، وزیراعظم آزاد کشمیر فیصل راٹھور
اس اہم بیٹھک کی صدارت خود وزیراعظم فیصل ممتاز راٹھور کریں گے، جس میں کشمیر کی مجموعی سیاسی، انتظامی اور سیکیورٹی کی صورتحال کا تفصیلی جائزہ لینے کے ساتھ ساتھ آئندہ کی سیاسی حکمتِ عملی پر گہری مشاورت کی جائے گی۔
اس پارلیمانی اجلاس کے ایجنڈے میں آزاد کشمیر قانون ساز اسمبلی کے آئندہ انتخابات، پارٹی کے تنظیمی امور، امیدواروں کے انتخاب، ٹکٹوں کی تقسیم اور انتخابی مہم سے متعلق اہم ترین فیصلے شامل ہیں۔
اس کے علاوہ، کشمیر میں عوامی ایکشن کمیٹی کی حالیہ سرگرمیوں اور اس کے نتیجے میں بدلتی ہوئی سیاسی صورتحال پر بھی غور کیا جائے گا۔
یہ بھی پڑھیں: آزاد کشمیر: ایکشن کمیٹی کی 9 جون کو احتجاج کی کال، الیکشن شیڈول بھی جاری، ریاست میں کیا ہونے جا رہا ہے؟
اجلاس میں سینیئر وزیر میاں عبدالوحید، سردار جاوید ایوب، بازل نقوی، سردار ضیا القمر، چوہدری قاسم مجید، جاوید اقبال بڈھانوی اور نبیلہ ایوب سمیت دیگر اہم رہنما شریک ہوں گے۔
دیوان علی خان چغتائی، ملک ظفر، چوہدری اخلاق، یاسر سلطان، چوہدری ارشد اور علی شان سونی کی شرکت کا بھی قوی امکان ہے۔
اس اجلاس کے فوراً بعد، وزیراعظم فیصل ممتاز راٹھور کی چیئرمین پیپلز پارٹی بلاول بھٹو زرداری سے ایک خصوصی اور الگ ملاقات بھی شیڈول ہے، جس میں ریاست کے اہم امور زیرِ بحث آئیں گے۔
دوسری جانب اس اہم بیٹھک سے قبل وزیراعظم آزاد کشمیر نے کشمیر ہاؤس اسلام آباد میں صحافیوں سے ایک غیر رسمی گفتگو کرتے ہوئے واضح کیا کہ ریاستی اداروں اور جمہوری نظام کے استحکام کو ہر صورت یقینی بنایا جائے گا۔
یہ بھی پڑھیں: آزادکشمیر: ایکشن کمیٹی پر پابندی کا فیصلہ درست، ریاستی امن پر کوئی سمجھوتہ نہیں ہوگا، شاہ غلام قادر
انہوں نے اس مؤقف کو دہرایا کہ ریاستی نظام کو کسی بھی قسم کی غیر یقینی صورتحال سے محفوظ رکھنا ہم سب کی مشترکہ ذمہ داری ہے۔
انہوں نے عوام سے پرزور اپیل کی کہ وہ آئندہ انتخابات میں جمہوری عمل کا حصہ بنیں اور اپنے ووٹ کے حق کا بھرپور استعمال کریں۔
آج شام ہونے والے اس اجلاس میں ارکان کو پارٹی کے سیاسی بیانیے اور عوامی رابطہ مہم پر تفصیلی بریفنگ دی جائے گی، جس کے بعد پارٹی قیادت اہم فیصلوں سے میڈیا کو آگاہ کرے گی۔
