طبی ماہرین کے مطابق کوئٹہ میں تیزاب گردی کے افسوسناک واقعے میں جھلس کر زخمی ہونیوالی ڈاکٹر ماہ نور ناصر کو بروقت کراچی منتقل کیے جانے کے باعث کسی بھی اہم عضو کو شدید اور ناقابل تلافی نقصان پہنچنے سے بچایا جا سکا ہے۔
وزیراعلیٰ بلوچستان میر سرفراز بگٹی کو دی گئی طبی بریفنگ میں اسپتال کے ماہرین نے بتایا کہ تیزاب سے متاثرہ مریضوں کے علاج میں وقت انتہائی اہمیت کا حامل ہوتا ہے کیونکہ تیزاب کے اثرات تیزی سے جسم پر مرتب ہوتے ہیں اور فوری طبی مداخلت نہ ہونے کی صورت میں زخموں کی شدت میں اضافہ ہو سکتا ہے۔
طبی ماہرین کے مطابق عام جلنے کے واقعات کے برعکس تیزاب سے ہونے والے زخموں میں ردعمل ظاہر کرنے کے لیے وقت بہت محدود ہوتا ہے، اس لیے متاثرہ مریض کو جلد از جلد خصوصی طبی سہولیات سے آراستہ مرکز تک پہنچانا ناگزیر ہوتا ہے۔
یہ بھی پڑھیں: کوئٹہ سول اسپتال میں خاتون ڈاکٹر پر تیزاب سے حملہ، مبینہ ملزم پولیس مقابلے میں ہلاک
انہوں نے واضح کیا کہ لیڈی ڈاکٹر ماہ نور ناصر کی بروقت کراچی منتقلی اور فوری طبی نگہداشت علاج کے عمل میں فیصلہ کن ثابت ہوئی۔
آغا خان اسپتال کے ہیڈ آف ڈیپارٹمنٹ نے بریفنگ کے دوران بتایا کہ اگر متاثرہ مریضہ کو فوری طور پر خصوصی علاج کے مرکز منتقل نہ کیا جاتا تو تیزاب کے اثرات جسم کے اہم اعضا کو زیادہ نقصان پہنچا سکتے تھے۔
ان کے مطابق بروقت طبی رسپانس اور فوری منتقلی کی بدولت ممکنہ پیچیدگیوں کو کم کرنے میں مدد ملی اور کسی عضو کے ضائع ہونے کے خطرات سے بچاؤ ممکن ہوا۔
طبی ماہرین نے حکومت بلوچستان کی جانب سے پیپلز ایئر ایمبولینس کے ذریعے متاثرہ مریضہ کی فوری منتقلی کے اقدام کو سراہتے ہوئے کہا کہ ایمرجنسی طبی حالات میں تیز رفتار فضائی منتقلی مریضوں کی جان بچانے اور سنگین طبی نقصانات سے محفوظ رکھنے میں کلیدی کردار ادا کرتی ہے۔
انہوں نے اس بات پر اطمینان کا اظہار کیا کہ لیڈی ڈاکٹر ماہ نور ناصر کی حالت بتدریج بہتر ہو رہی ہے اور انہیں جدید طبی سہولیات اور ماہر معالجین کی نگرانی میں علاج فراہم کیا جا رہا ہے، ماہرین نے امید ظاہر کی کہ علاج اور بحالی کا عمل مثبت انداز میں جاری رہے گا۔
مزید پڑھیں: لیڈی ڈاکٹر پر تیزاب گردی کے اندوہناک واقعے کے خلاف کوئٹہ میں احتجاج، ماہرہ خان بھی بول پڑیں
طبی ماہرین کے مطابق اس واقعے نے ایک بار پھر ثابت کیا ہے کہ ہنگامی حالات میں بروقت طبی رسپانس، فوری منتقلی اور جدید طبی سہولیات تک فوری رسائی مریضوں کی جان بچانے اور مستقل جسمانی نقصان سے محفوظ رکھنے میں بنیادی کردار ادا کرتی ہے۔
چند روز قبل کوئٹہ میں نامعلوم شخص کی جانب سے لیڈی ڈاکٹر ماہ نور ناصر پر تیزاب پھینکنے کا افسوسناک واقعہ پیش آیا تھا جس کے نتیجے میں وہ جھلس کر زخمی ہو گئی تھیں۔
واقعے کے بعد حکومت بلوچستان نے فوری کارروائی کرتے ہوئے انہیں پیپلز ایئر ایمبولینس کے ذریعے کراچی منتقل کیا، جہاں آغا خان اسپتال میں ان کا خصوصی علاج جاری ہے۔
