سوشل میڈیا پر ’گیٹ ریڈی وِد می‘ اور اسکن کیئر ویڈیوز کی بڑھتی ہوئی مقبولیت نے کم عمر بچیوں میں خوبصورتی اور بے داغ جلد کے حصول کا ایسا رجحان پیدا کر دیا ہے جسے ماہرین اب ’کاسمیٹیکوریکسیا‘ کا نام دے رہے ہیں۔
یہ بھی پڑھیں: اینڈومیٹریوسس: خواتین کی تکلیف دہ بیماری کی اب تشخیص جلد ممکن
ماہرین کے مطابق کاسمیٹیکوریکسیا ایک ایسی کیفیت ہے جس میں بچے، خصوصاً لڑکیاں، کم عمری ہی سے بے عیب جلد حاصل کرنے کے لیے اسکن کیئر مصنوعات کے استعمال کی حد تک دلچسپی یا جنون کا شکار ہو جاتی ہیں۔
سوشل میڈیا پلیٹ فارمز پر ہزاروں ویڈیوز میں کم عمر بچیاں مختلف کریمز، سیرمز، ٹونرز اور میک اپ مصنوعات استعمال کرتے ہوئے اپنی روزمرہ اسکن کیئر روٹین شیئر کرتی دکھائی دیتی ہیں۔ بعض بچیاں تو روزانہ متعدد مصنوعات استعمال کرتی ہیں اور مختلف بیوٹی برانڈز کی تشہیر بھی کرتی ہیں۔
ماہرین کا کہنا ہے کہ ماضی میں نوجوان لڑکیوں کو جلد صاف رکھنے یا دانوں سے نجات دلانے والی مصنوعات کی تشہیر کا سامنا تھا لیکن اب صورتحال مختلف ہے۔ سوشل میڈیا کے دور میں اینٹی ایجنگ اور ’فلالیس اسکن‘ کے تصورات کم عمر بچیوں تک بھی پہنچ چکے ہیں۔
9 تا 12 سالہ بچوں کی کتنی تعداد اس کیفیت میں مبتلا ہے؟
اس رجحان کے حوالے سے اکثر یہ تاثر دیا جاتا ہے کہ دنیا بھر کے تقریباً نصف بچے باقاعدگی سے اسکن کیئر مصنوعات استعمال کرتے ہیں تاہم اصل اعداد و شمار اس سے مختلف ہیں۔
درحقیقت یہ دعویٰ عالمی سطح پر تمام بچوں کے بارے میں نہیں بلکہ ایک محدود سروے پر مبنی ہے۔ اسکن کیئر برانڈ ’پائی‘ کی جانب سے 9 سے 12 سال عمر کے 1,500 بچوں پر کیے گئے ایک جائزے میں تقریباً نصف شرکا نے بتایا کہ وہ ہفتہ وار بنیادوں پر متعدد اسکن کیئر مصنوعات استعمال کرتے ہیں جبکہ ان میں سے بہت سے بچوں کا کہنا تھا کہ وہ اپنی جلد میں موجود سمجھی جانے والی خامیوں کو دور کرنے کے لیے یہ مصنوعات استعمال کرتے ہیں۔
مزید پڑھیے: خیالی پلاؤ: جاگتے میں خواب دیکھنا ٹھیک لیکن لت خطرناک
ماہرین کے مطابق اگرچہ اس سروے کے نتائج کم عمر بچوں میں اسکن کیئر کے بڑھتے ہوئے رجحان کی نشاندہی کرتے ہیں تاہم انہیں دنیا بھر کے تمام بچوں پر منطبق نہیں کیا جا سکتا۔ اس کے باوجود یہ تحقیق اس بات کا اشارہ ضرور دیتی ہے کہ سوشل میڈیا اور بیوٹی انڈسٹری کا اثر کم عمر بچوں، خصوصاً لڑکیوں، کی روزمرہ عادات اور خود اعتمادی پر تیزی سے بڑھ رہا ہے۔
اطالوی ماہر امراضِ جلد پروفیسر جیوانی دامیانی کے مطابق کاسمیٹیکوریکسیا میں مبتلا بچوں کی ایک نمایاں خصوصیت یہ ہے کہ وہ سوشل میڈیا پر اسکن کیئر اور خوبصورتی سے متعلق مواد دیکھنے میں گھنٹوں صرف کرتے ہیں اور روزانہ کئی مختلف مصنوعات استعمال کرتے ہیں۔
ان کے مطابق بعض بچے اس حد تک متاثر ہو جاتے ہیں کہ میک اپ یا اسکن کیئر مصنوعات کے بغیر گھر سے نکلنے یا دوستوں سے ملنے میں بھی جھجھک محسوس کرتے ہیں۔
جلد کو نقصان پہنچانے والی مصنوعات
ماہرین امراضِ جلد خبردار کرتے ہیں کہ بچوں کی جلد فطری طور پر نرم، صحت مند اور حساس ہوتی ہے اس لیے بالغ افراد کے لیے تیار کی جانے والی اینٹی ایجنگ مصنوعات ان کے لیے غیر ضروری بلکہ نقصان دہ بھی ثابت ہو سکتی ہیں۔
مزید پڑھیں: بچوں کی صحت پر منفی اثرات کیوں، آپ یہ مسئلہ بآسانی کیسے حل کرسکتے ہیں؟
برطانیہ سے تعلق رکھنے والی ماہر امراض جلد ڈاکٹر جین آئر کے مطابق بعض مصنوعات میں ایسے فعال اجزا شامل ہوتے ہیں جو جلد کے خلیوں کے کام کرنے کے طریقے کو تبدیل کرتے ہیں۔
ان کا کہنا ہے کہ جھریوں اور بڑھتی عمر کے اثرات کم کرنے کے لیے استعمال ہونے والا جزو ’ریٹینول‘ُ بچوں کی جلد کے لیے موزوں نہیں۔ اس کے زیادہ استعمال سے جلد کی حفاظتی تہہ متاثر ہو سکتی ہے جس کے نتیجے میں جلن، خارش، حساسیت اور ایکزیما جیسی علامات پیدا ہو سکتی ہیں۔
ماہرین کا کہنا ہے کہ مختلف کریمز اور سیرمز کے مسلسل استعمال سے بعض بچوں میں کانٹیکٹ ڈرماٹائٹس یعنی جلدی الرجی کے کیسز میں بھی اضافہ دیکھا جا رہا ہے۔
ذہنی صحت پر ممکنہ اثرات
ماہرین نفسیات کے مطابق مسئلہ صرف جلد تک محدود نہیں بلکہ اس کے نفسیاتی اثرات بھی مرتب ہو سکتے ہیں۔
ماہر نفسیات البرٹو اسٹیفانا کا کہنا ہے کہ مسلسل سوشل میڈیا استعمال کرنے والے بعض بچے اپنی ظاہری شکل کے بارے میں غیر ضروری حد تک حساس ہو جاتے ہیں اور اپنی خود اعتمادی کو سوشل میڈیا پر ملنے والے تبصروں اور پسندیدگی سے جوڑ لیتے ہیں۔
یہ بھی پڑھیے: موٹاپا کم کرنے والے انجیکشن چھوڑنے کے بعد وزن قابو میں رکھنے کے لیے نئی گولی پر امید افزا تحقیق
ان کے مطابق بعض کم عمر بچے اپنی تصاویر یا ظاہری شکل کو دوسروں سے موازنہ کرتے ہوئے احساسِ کمتری کا شکار ہو سکتے ہیں جبکہ کچھ میں بے چینی اور شرمندگی جیسے جذبات بھی پیدا ہو سکتے ہیں۔
فلٹرز سے تیار کردہ تصاویر کا جنون
ماہرین خبردار کرتے ہیں کہ فلٹرز اور مصنوعی ذہانت سے تیار کردہ تصاویر کے باعث نوجوان نسل خوبصورتی کے ایسے معیار کا تعاقب کر رہی ہے جو حقیقت میں موجود ہی نہیں۔
سوشل میڈیا اور بیوٹی انڈسٹری کا کردار
اسکن کیئر کی عالمی صنعت اربوں ڈالرز تک پہنچ چکی ہے اور اس میں تیزی سے اضافہ ہو رہا ہے۔
مزید پڑھیں: دل کی دھڑکن اتنی غیر یکساں کیوں، یہ کس بات کے اشارے ہوسکتے ہیں؟
ماہرین کے مطابق سوشل میڈیا پلیٹ فارمز، بیوٹی برانڈز اور متاثر کن شخصیات اس رجحان کو فروغ دینے میں اہم کردار ادا کر رہے ہیں جبکہ والدین کے لیے بھی ضروری ہو گیا ہے کہ وہ بچوں کی اسکن کیئر عادات اور استعمال ہونے والی مصنوعات پر نظر رکھیں۔
برطانوی کاسمیٹکس انڈسٹری کی نمائندہ تنظیم کیا کہتی ہے؟
برطانوی کاسمیٹکس انڈسٹری کی نمائندہ تنظیم کاسمیٹکس، ٹوائلٹری اینڈ پرفیومری ایسوسی ایشن کا کہنا ہے کہ کم عمر بچوں کے لیے اینٹی ایجنگ مصنوعات یا پیچیدہ اسکن کیئر روٹین کی حوصلہ افزائی نہیں کی جانی چاہیے بلکہ عمر کے مطابق سادہ اور محفوظ جلدی نگہداشت کافی ہوتی ہے۔
بچوں کو پیچیدہ اسکن کیئر کی ضرورت ہی نہیں، والدین کو کیا کرنا چاہیے؟
ماہرین کے مطابق بچوں کی جلد کو عام طور پر پیچیدہ اسکن کیئر روٹین کی ضرورت نہیں ہوتی۔ مناسب صفائی، متوازن غذا، پانی کا استعمال اور دھوپ سے تحفظ ہی صحت مند جلد کے لیے کافی ہیں۔
مزید پڑھیے: پاکستانی معروف اداکارہ کو اسکن ٹریٹمنٹ کرانا مہنگا پڑگیا
ان کا کہنا ہے کہ والدین بچوں کو سوشل میڈیا پر دکھائی جانے والی خوبصورتی کے غیر حقیقی معیارات سے آگاہ کریں اور انہیں یہ سمجھائیں کہ خوبصورتی صرف ظاہری شکل کا نام نہیں بلکہ صحت، اعتماد اور فطری انداز بھی اس کا اہم حصہ ہیں۔
