سپریم جوڈیشل کونسل نے اعلیٰ عدلیہ کے ججز کے ضابطہ اخلاق (کوڈ آف کنڈکٹ) میں ترامیم کی منظوری دے دی، جس کے تحت وفاقی آئینی عدالت کو بھی ضابطہ اخلاق میں شامل کر لیا گیا ہے، جبکہ ججز کی سیاسی اور سفارتی تقریبات میں شرکت کے حوالے سے نئی پابندیاں عائد کر دی گئی ہیں۔
یہ بھی پڑھیں:چیف جسٹس آف پاکستان کی بار نمائندگان سے اہم مشاورتی ملاقات، ضلعی عدالتوں کی ڈیجیٹلائزیشن پر بریفنگ
اعلامیے کے مطابق ججز کے ضابطہ اخلاق میں ترامیم 11 جون کو ہونے والے سپریم جوڈیشل کونسل کے اجلاس میں منظور کی گئیں۔ ترامیم کے بعد اعلیٰ عدلیہ کے ججز چیف جسٹس کی اجازت کے بغیر سیاسی یا سفارتی تقریبات میں شرکت نہیں کر سکیں گے۔
وفاقی آئینی عدالت اور وفاقی شرعی عدالت کے ججز پر بھی ضابطہ اخلاق کا اطلاق
ترمیم کے بعد ججز کوڈ آف کنڈکٹ کا اطلاق وفاقی آئینی عدالت اور وفاقی شرعی عدالت کے ججز پر بھی ہوگا۔ اس سے قبل ججز کی سماجی اور ثقافتی تقریبات میں شرکت پر پابندی تھی، تاہم نئی ترامیم میں سیاسی اور سفارتی تقریبات کو خصوصی طور پر شامل کیا گیا ہے۔
اعلامیے کے مطابق ضابطہ اخلاق کے آرٹیکل 15 کے پیراگراف 2 اور 3 میں ترمیم کر کے وفاقی آئینی عدالت کا نام شامل کیا گیا ہے۔
c
ترامیم میں ججز پر دباؤ ڈالنے، شکایات یا عدلیہ میں مداخلت سے متعلق معاملات کے لیے بھی طریقہ کار وضع کیا گیا ہے۔ شکایت کی صورت میں ہائیکورٹ کے ججز اپنے متعلقہ چیف جسٹس کو تحریری طور پر آگاہ کریں گے، جبکہ سپریم کورٹ، وفاقی آئینی عدالت کے چیف جسٹس اور دونوں عدالتوں کے دو دو سینئر ترین ججز کو بھی مطلع کیا جائے گا۔
اعلامیے کے مطابق ججز کمیٹی شکایات پر 14 روز کے اندر کارروائی مکمل کرے گی، جبکہ مقررہ مدت میں پیش رفت نہ ہونے کی صورت میں سپریم کورٹ اور وفاقی آئینی عدالت معاملہ خود دیکھ سکیں گی۔
