وزیر خزانہ اسحاق ڈار نے کہا ہے کہ عمران خان نہیں چاہتے کہ ملک آگے جائے اور عزت کے ساتھ رہے بلکہ وہ چاہتے ہیں کہ ان کی اپوزیشن میں ملک نیچے جائے۔
سابق وزیراعظم کی ٹوئٹ پر ردعمل میں وزیر خزانہ اسحاق ڈار نے لکھا عمران خان کی غیر ذمہ دارانہ ٹوئٹ کا مقصد ملکی سکیورٹی صورتحال کو نقصان پہنچانا اور سیاسی ماحول کو گندا کرنا ہے۔
اسحاق ڈار نے مزید لکھا عمران خان کی جانب سے دنیا میں 27 نمبر کی معیشت کو 2022 میں 47 ویں نمبر پر پہنچانا ان کی بدانتظامی، نااہلی، نالائقی اور کرپشن سے بھرپور دور
کا ثبوت ہے جس کا خمیازہ آج پاکستان کے عوام ناقابل برداشت مہنگائی کی صورت بھگت رہے ہیں ۔
ڈار نے لکھا کہ ہر کوئی جانتا ہے جب سے خود غرض اور تکبر میں مبتلا عمران خان کو آئینی طریقے سے وزارت عظمیٰ کی کرسی سے ہٹایا گیا تو وہ بوکھلا چکے ہیں۔
انہوں نے ٹوئٹ میں مزید لکھا وزیراعظم شہباز شریف اور عمران خان کا موازنہ کیا ہی نہیں جا سکتا، وزیراعظم شہباز شریف نے سیاسی جماعت کے لیڈر کے طور پر
عمران خان کو نیشنل ایکشن پلان اور قومی سلامتی کے لیے ڈائیلاگ میں شرکت کی دعوت دی لیکن اس پر عمران خان کا بھدا اور احمقانہ ردعمل انہتائی حیران کن ہے۔
اسحاق ڈار نے اپنی ٹوئٹ کے آخر میں لکھا انتہائی معذرت کے ساتھ، عمران خان چاہتے ہیں ملک عزت کے ساتھ آگے بڑھنے کے بجائے نیچے جائے۔
یاد رہے چیئرمین پاکستان تحریک انصاف عمران خان کی جانب سے سوشل میڈیا پر گزشتہ روز ایک تصویر شیئر کی گئی تھی جس میں انہوں نے موجودہ دور میں گرفتار اور قتل ہونے والے افراد کی تصاویر اور نام درج کرتے ہوئے پی ڈی ایم کی حکومت کو تنقید کا نشانہ بنایا اور ملکی معیشت کی تباہی کا ذمہ دار ٹھہرایا تھا ۔
