پاکستان کی سینئر اور نامور اداکارہ ثانیہ سعید نے سندھ حکومت کے ترقیاتی منصوبوں اور پالیسیوں پر سخت تنقید کرتے ہوئے کہا ہے کہ جب تک شہریوں کو روزگار کے مواقع فراہم نہیں کیے جاتے، محض ٹرانسپورٹ منصوبے کسی مسئلے کا حل نہیں ہو سکتے۔
اداکارہ نے کہا کہ اگر لوگوں کے پاس نوکریاں ہی موجود نہ ہوں تو وہ گرین بس یا دیگر ٹرانسپورٹ سروسز سے آخر فائدہ کیسے اٹھائیں گے۔ ان کے مطابق اصل سوال یہ ہے کہ حکومت نے کبھی اس پہلو پر غور ہی نہیں کیا کہ اس شہر میں اتنی بڑی آبادی کو روزگار کیسے فراہم کیا جائے گا۔
اداکارہ نے کہا کہ گرین بس میں بیٹھ کر انسان کہاں جائے گا؟ نوکری ہے نہیں، حکومت نے کبھی سوچا ہی نہیں تھا کہ اس شہر میں اتنا بندہ آکر رہے گا۔ ثانیہ سعید نے کہا کیا نوکری دو گے وہ کیسے اکانومی میں رہیں گے؟ اکانومی کو واپس کیا کریں گے؟ اتنا نوجوان یہاں بے روزگار پھر رہا ہے، بسیں بنانے سے کچھ نہیں ہوگا یہ جو لائنیں ڈالی جارہی ہیں، ریڈ بس، اورنج بس، گرین بس اس سے کچھ نہیں ہوگا۔
انہوں نے کہا گرین بس میں بیٹھ کر میں کہاں جاؤں گی؟ نوکری نہیں ہے میرے پاس۔ بسوں سے شہر تھوڑی بنتا ہے، سڑک نہیں ہو گی تو مشکلات ہوں گی لیکن شہر کا پورا احساس ہے اگر آپ نے شہر کے لوگوں کو اجنبی کردیا ہے تو وہ شہر کیا بچا؟۔
