حکومت نے صارفین کی شکایات کے پیش نظر ملک بھر میں بجلی کے بلوں کا نیا اور آسان فارمیٹ متعارف کرا دیا ہے۔ حکام کے مطابق نئے ڈیزائن میں بل کی اہم معلومات زیادہ واضح انداز میں درج کی گئی ہیں تاکہ صارفین کو بل سمجھنے میں دشواری کا سامنا نہ ہو۔
ترجمان کے مطابق ملک بھر میں بجلی کے بلوں کے لیے نیا ڈیزائن جاری کر دیا گیا ہے، جس کا مقصد بلوں کو زیادہ سادہ، شفاف اور صارف دوست بنانا ہے۔
یہ بھی پڑھیں:بجلی صارفین کے لیے بڑی خوشخبری، فی یونٹ قیمت میں ایک روپے 99 پیسے کمی
انہوں نے بتایا کہ صارفین کی جانب سے موصول ہونے والی شکایات کے بعد بجلی کے بل کے فارمیٹ کو مکمل طور پر ازسرِ نو تیار کیا گیا۔ پرانے بل میں غیر ضروری معلومات، پیچیدہ ترتیب اور تکنیکی اصطلاحات کی وجہ سے عام صارفین کو بل سمجھنے میں مشکلات پیش آتی تھیں۔
ترجمان کے مطابق نئے فارمیٹ میں قابلِ ادا رقم، بل جمع کرانے کی آخری تاریخ اور بجلی کے استعمال کی تفصیلات نمایاں انداز میں درج کی گئی ہیں، جس سے صارفین کو ضروری معلومات فوری طور پر دستیاب ہوں گی۔
انہوں نے کہا کہ نئے ڈیزائن کی تیاری میں سادگی، شفافیت اور بہتر صارف تجربے کو خصوصی طور پر مدنظر رکھا گیا ہے تاکہ ہر طبقے کے لوگ آسانی سے اپنے بل کی تفصیلات سمجھ سکیں۔
یہ بھی پڑھیں:سرکاری ملازمین کی مفت بجلی ختم کرنے کے نوٹیفکیشنز معطل، پشاور ہائیکورٹ کا عبوری حکم
جدید سہولتوں کے تحت نئے بجلی کے بلوں میں کیو آر (QR) کوڈ بھی شامل کیا گیا ہے، جس کی مدد سے صارفین اضافی معلومات اور مختلف ڈیجیٹل خدمات تک فوری رسائی حاصل کر سکیں گے۔
ترجمان کا کہنا ہے کہ نئے فارمیٹ کے نفاذ سے نہ صرف بلوں کو سمجھنا آسان ہوگا بلکہ صارفین اور بجلی کی تقسیم کار کمپنیوں کے درمیان رابطے اور معلومات تک رسائی کا عمل بھی مزید مؤثر بنے گا۔
