وزیراعظم پاکستان شہباز شریف سے چیئرمین پاکستان پیپلز پارٹی بلاول بھٹو نے ملاقات کی، جس میں مشرق وسطیٰ کی صورتحال، ملکی سیاسی امور، ترقیاتی منصوبوں اور بجٹ سمیت اہم قومی معاملات پر تبادلہ خیال کیا گیا۔
ملاقات میں سینیٹر شیری رحمان اور رکن قومی اسمبلی سید نوید قمر بھی چیئرمین پاکستان پیپلز پارٹی کے ہمراہ موجود تھے۔
بلاول بھٹو زرداری کی وزیراعظم شہباز شریف سے ملاقات pic.twitter.com/QB1rHozvtv
— WE News (@WENewsPk) June 17, 2026
اس موقع پر بلاول بھٹو زرداری نے مشرق وسطیٰ کی موجودہ صورتحال کے تناظر میں عالمی امن کے فروغ کے لیے پاکستان کی سفارتی کوششوں کو سراہتے ہوئے وزیراعظم شہباز شریف اور فیلڈ مارشل سید عاصم منیر کو خراج تحسین پیش کیا۔
وزیراعظم اور بلاول بھٹو زرداری کے درمیان ہونے والی ملاقات میں باہمی دلچسپی کے سیاسی اور ملکی امور پر بھی تفصیلی تبادلہ خیال کیا گیا۔
دونوں رہنماؤں نے وفاقی حکومت کی جانب سے صوبہ سندھ میں جاری ترقیاتی منصوبوں کا جائزہ لیا اور ان منصوبوں پر پیش رفت کے مختلف پہلوؤں پر گفتگو کی۔
ملاقات کے دوران وفاقی بجٹ سے متعلق امور بھی زیر غور آئے جبکہ ملک کی مجموعی معاشی صورتحال اور عوامی فلاح سے متعلق اقدامات پر بھی تبادلہ خیال کیا گیا۔
وزیراعظم شہباز شریف نے اس موقع پر وفاق اور صوبوں کے درمیان مؤثر رابطہ کاری اور باہمی تعاون کو قومی ترقی کے لیے ناگزیر قرار دیتے ہوئے کہا کہ ملکی ترقی اور عوامی مسائل کے حل کے لیے تمام اداروں اور حکومتوں کو مشترکہ طور پر کام کرنا ہوگا۔
ملاقات میں اس امر پر اتفاق کیا گیا کہ قومی اہمیت کے منصوبوں کی کامیاب تکمیل اور عوام کو بہتر سہولیات کی فراہمی کے لیے وفاقی اور صوبائی اداروں کے درمیان قریبی تعاون کا سلسلہ جاری رکھا جائے گا۔
چیئرمین پاکستان پیپلز پارٹی بلاول بھٹو زرداری نے گلگت بلتستان میں حکومت سازی کے معاملے میں تعاون اور حمایت پر وزیراعظم شہباز شریف کا شکریہ بھی ادا کیا۔
ملاقات میں نائب وزیراعظم و وزیر خارجہ اسحاق ڈار، وزیر خزانہ محمد اورنگزیب، وفاقی وزیر قانون اعظم نذیر تارڑ اور وزیر برائے اقتصادی امور احد چیمہ بھی موجود تھے۔
