خصوصی سرمایہ کاری سہولت کونسل یعنی ایس آئی ایف سی نے ماچکے–ٹھلیاں–تارو جبہ وائٹ آئل پائپ لائن منصوبے کی منظوری میں کامیاب کردار ادا کیا ہے۔
اس ضمن میں جاری ایک اعلامیے کے مطابق یہ اہم انفراسٹرکچر منصوبہ پاکستان کی توانائی سلامتی، ایندھن کی ترسیل کے نظام میں بہتری اور قومی رابطہ کاری کو مزید مضبوط بنانے میں معاون ثابت ہوگا۔
435 کلومیٹر طویل یہ پائپ لائن منصوبہ ایس آئی ایف سی کے ترجیحی ایجنڈے کا حصہ رہا ہے، جبکہ اس کے لیے مفاہمت کی یادداشت بھی ایس آئی ایف سی کے پلیٹ فارم کے تحت طے پائی، جو پاکستان کے اہم توانائی شعبے میں بین الاقوامی تعاون اور سرمایہ کاری کے فروغ میں ایس آئی ایف سی کے کردار کو اجاگر کرتی ہے۔
یہ بھی پڑھیں: وزیراعظم کی سربراہی میں خصوصی سرمایہ کاری سہولت کونسل کی کابینہ کمیٹی کا قیام
متعلقہ اداروں کے درمیان مؤثر رابطہ کاری اور مسلسل اقدامات کے ذریعے ایس آئی ایف سی نے منصوبے کو درپیش اہم چیلنجز کے حل میں معاونت فراہم کی اور ضروری منظوریوں کے حصول میں اہم کردار کے باعث اس اہم تزویراتی منصوبے پر پیشرفت ممکن ہوئی۔
وائٹ آئل پائپ لائن پاکستان میں جنوبی سے شمالی علاقوں تک وائٹ آئل کی ترسیل کے لیے ایک اہم راہداری قائم کرے گی۔
منصوبے کی تکمیل کے بعد ایندھن کی فراہمی کے نظام میں بہتری آئے گی اور سڑک کے ذریعے ترسیل پر انحصار کم ہوگا۔
Paving the way for stronger energy connectivity, #SIFC facilitated the approval of the Machike–Thallian–Tarru Jabba White Oil Pipeline (WOP).
This strategic project will establish a vital south-to-north corridor for white oil transportation across #Pakistan. Moreover, it will:… pic.twitter.com/op1L00xLdd
— SIFC | Special Investment Facilitation Council🇵🇰 (@sifcpakistan) June 23, 2026
اعلامیے کے مطابق اسی طرح لاجسٹکس کے اخراجات میں کمی آئے گی، ایندھن کے نقصانات کم ہوں گے اور ملک کے توانائی سپلائی نظام کی مجموعی استعداد اور اعتماد میں اضافہ ہوگا۔
’توانائی سلامتی کو مضبوط بنانے کے ساتھ ساتھ یہ منصوبہ روزگار کے مواقع پیدا کرنے، توانائی کے بنیادی ڈھانچے کو جدید بنانے اور سرمایہ کاروں کے اعتماد میں اضافے کا باعث بنے گا، جو پاکستان میں بڑے پیمانے پر اسٹریٹجک سرمایہ کاری کے فروغ کے عزم کی عکاسی کرتا ہے۔‘
مزید پڑھیں: ایس آئی ایف سی کے تعاون سے چینی کمپنی پنجاب میں سولر پینل پلانٹ لگائے گی
وائٹ آئل پائپ لائن منصوبے کی کامیاب معاونت ایس آئی ایف سی کے اس مسلسل کردار کو ظاہر کرتی ہے جس کے تحت کونسل پاکستان کے کاروباری ماحول کو مضبوط بنانے، سرمایہ کاری کے مواقع پیدا کرنے اور پائیدار معاشی ترقی و قومی مفاد سے وابستہ اہم انفراسٹرکچر منصوبوں کی رفتار تیز کرنے میں معاونت فراہم کر رہی ہے۔
