اسلامی فوجی انسدادِ دہشتگردی اتحاد (IMCTC) نے اقوام متحدہ کے ہیڈکوارٹرز، نیویارک میں جاری انسدادِ دہشتگردی ہفتہ (UN Counter-Terrorism Week) میں شرکت کرتے ہوئے دہشتگردی کے خلاف عالمی تعاون، تجربات کے تبادلے اور مشترکہ حکمتِ عملی کو مزید مؤثر بنانے کے عزم کا اعادہ کیا ہے۔
سعودی وزیر دفاع اور اسلامی فوجی انسدادِ دہشتگردی اتحاد (IMCTC) کی وزرائے دفاع کونسل کے چیئرمین شہزادہ خالد بن سلمان بن عبدالعزیز کی ہدایت پر اتحاد کا ایک اعلیٰ سطحی وفد اقوام متحدہ کے ہیڈکوارٹرز، نیویارک میں منعقد ہونے والے انسدادِ دہشتگردی ہفتہ (UN Counter-Terrorism Week) میں شرکت کر رہا ہے۔
اسلامی فوجی انسدادِ دہشتگردی اتحاد کے سیکریٹری جنرل میجر جنرل محمد المغیدی کی سربراہی میں شریک وفد اقوام متحدہ کے دفتر برائے انسدادِ دہشتگردی (UNOCT) کے زیر اہتمام ہونے والے اس عالمی فورم میں مختلف رکن ممالک، ماہرین اور بین الاقوامی اداروں کے سربراہان کے ساتھ دہشتگردی کے خلاف عالمی حکمتِ عملی اور ابھرتے ہوئے خطرات پر تبادلۂ خیال کر رہا ہے۔
میجر جنرل محمد المغیدی نے کہا کہ اس فورم میں اتحاد کی شرکت اس بات کا مظہر ہے کہ آئی ایم سی ٹی سی دہشتگردی کے خلاف عالمی کوششوں میں ایک فعال شراکت دار کے طور پر اپنا کردار ادا کر رہا ہے۔ ان کے مطابق اتحاد اپنے 4 بنیادی شعبوں، یعنی نظریاتی محاذ، ابلاغ، دہشتگردی کی مالی معاونت کی روک تھام اور عسکری تعاون کے ذریعے رکن ممالک کی صلاحیتوں کو یکجا کرنے اور علاقائی تجربات کے تبادلے کے لیے کام کر رہا ہے۔
تقریب کے موقع پر میجر جنرل محمد المغیدی نے اقوام متحدہ میں سعودی عرب کے مستقل مندوب ڈاکٹر عبدالعزیز الواصل، اقوام متحدہ کے دفتر برائے انسدادِ دہشتگردی کے قائم مقام انڈر سیکریٹری جنرل الیگزینڈر زویف اور اقوام متحدہ کے انسدادِ دہشتگردی مرکز کے ڈائریکٹر ماؤرو میڈیکو سے الگ الگ ملاقاتیں بھی کیں۔
ان ملاقاتوں میں اسلامی فوجی انسدادِ دہشتگردی اتحاد اور اقوام متحدہ کے متعلقہ اداروں کے درمیان ادارہ جاتی تعاون کو مزید فروغ دینے، مشترکہ اقدامات بڑھانے اور دہشتگردی کے خلاف عالمی سطح پر مؤثر اشتراکِ عمل کو مضبوط بنانے پر تبادلۂ خیال کیا گیا۔
