پاکستان ایئرپورٹس اتھارٹی (پی اے اے) نے مون سون کے موسم میں پرندوں کی بڑھتی سرگرمی کے پیشِ نظر احتیاطی اقدامات کے تحت اعلان کیا ہے کہ لاہور کے علامہ اقبال انٹرنیشنل ایئرپورٹ کے دونوں رن وے 5 جولائی سے 15 ستمبر 2026 تک روزانہ 3 گھنٹے کے لیے تجارتی پروازوں کے لیے بند رہیں گے۔
پی اے اے کی جانب سے بدھ کو جاری بیان میں کہا گیا کہ مون سون کے دوران ایئرپورٹ اور اس کے اطراف، خصوصاً 3 ہزار فٹ سے کم بلندی پر، پرندوں کی نقل و حرکت میں نمایاں اضافہ ہو جاتا ہے، جس کے باعث طیاروں کی لینڈنگ اور ٹیک آف کے دوران برڈ ہٹ (Bird Strike) کا خطرہ بڑھ جاتا ہے۔
اتھارٹی نے تمام پائلٹس کو ہدایت کی ہے کہ وہ لینڈنگ اور ٹیک آف کے دوران غیر معمولی احتیاط برتیں، جبکہ ایئرلائنز کو بھی ممکنہ زمینی یا فضائی تاخیر کے پیشِ نظر اضافی ایندھن ساتھ رکھنے کی ہدایت کی گئی ہے۔
یہ بھی پڑھیے نواز شریف نے لاہور ایئرپورٹ میں جدید اسٹیٹ لاؤنج کا افتتاح کردیا، اس میں خاص بات کیا ہے؟
پی اے اے کے مطابق حفاظتی اقدامات کے تحت لاہور ایئرپورٹ کے دونوں رن وے 5 جولائی سے 15 ستمبر تک روزانہ صبح 5 بجے سے 8 بجے تک دستیاب نہیں ہوں گے، کیونکہ اس وقت پرندوں کی سرگرمی اپنے عروج پر ہوتی ہے۔ ان اوقات کے علاوہ تمام شیڈول کے مطابق تجارتی پروازیں معمول کے مطابق چلتی رہیں گی۔
بیان میں واضح کیا گیا کہ کسی بھی ہنگامی صورتحال کی صورت میں رن وے فوری طور پر لینڈنگ کے لیے دستیاب کر دیا جائے گا۔
پاکستان ایئرپورٹس اتھارٹی نے اس حوالے سے نوٹس ٹو ایئرمین (NOTAM) بھی جاری کر دیا ہے تاکہ تمام متعلقہ ایئرلائنز اور فضائی آپریٹرز کو پیشگی آگاہ کیا جا سکے۔
یہ بھی پڑھیے لاہور ایئرپورٹ پر نجی ایئر لائنز کی پرواز حادثے سے بال بال بچ گئی، مسافروں کی چیخیں
پی اے اے نے یقین دہانی کرائی کہ فضائی تحفظ کے اعلیٰ ترین معیارات برقرار رکھتے ہوئے مسافروں اور ایئرلائنز کو کم سے کم پریشانی کا سامنا کرنے دیا جائے گا۔
دوسری جانب محکمہ موسمیات کے مطابق ملک میں جولائی کے پہلے ہفتے سے مون سون بارشوں کا نیا سلسلہ شروع ہونے کا امکان ہے، جبکہ لاہور میں یکم جولائی سے 6 جولائی کے دوران بارشوں کی پیش گوئی بھی کی گئی ہے۔
