مائیکروسافٹ کے ہزاروں ملازمین کی برطرفی کا امکان

امریکی ٹیکنالوجی کمپنی مائیکروسافٹ آئندہ ہفتے ملازمین کی ایک اور بڑی تعداد کو برطرف کرنے کی تیاری کررہی ہے، جس کے تحت 5 ہزار 500 سے زائد ملازمین متاثر ہوسکتے ہیں۔

بزنس انسائیڈر کی رپورٹ کے مطابق برطرفیوں کا اعلان آئندہ ہفتے متوقع ہے، جبکہ اس سے کنسلٹنگ، سیلز اور ایکس باکس گیمنگ سمیت مختلف شعبے متاثر ہوں گے۔

یہ بھی پڑھیں: اسرائیلی فوج کو اے آئی اور کلاؤڈ سروسز دینے  کے خلاف مائیکروسافٹ  کے احتجاجی ملازمین  نوکری سے برخاست

رپورٹ کے مطابق یہ اقدام مائیکروسافٹ کی وسیع تر حکمت عملی کا حصہ ہے، کیونکہ بڑی ٹیکنالوجی کمپنیاں مصنوعی ذہانت، کلاؤڈ کمپیوٹنگ اور نئی ٹیکنالوجیز میں سرمایہ کاری بڑھانے کے لیے اپنے اخراجات کم کررہی ہیں، تاہم مائیکروسافٹ نے تاحال ان اطلاعات کی سرکاری طور پر تصدیق نہیں کی۔

کن ملازمین پر اثر پڑے گا؟

بزنس انسائیڈر کے مطابق برطرفیاں مختلف کاروباری شعبوں میں ہوں گی، جن میں سیلز اور کنسلٹنگ ٹیموں کے ملازمین سب سے زیادہ متاثر ہونے کا امکان ہے۔

رپورٹ میں یہ بھی کہا گیا ہے کہ مائیکروسافٹ کے ایکس باکس گیمنگ ڈویژن کے بعض ملازمین بھی برطرفیوں کی زد میں آ سکتے ہیں، کیونکہ کمپنی اپنی گیمنگ حکمت عملی کا ازسرِنو جائزہ لے رہی ہے۔

یہ بھی پڑھیں: مائیکروسافٹ کا 10 ہزار ملازمین کو فارغ کرنے کا فیصلہ

مائیکروسافٹ کی امریکی سیکیورٹیز اینڈ ایکسچینج کمیشن میں جمع کرائی گئی تازہ سالانہ رپورٹ کے مطابق 30 جون 2025 تک کمپنی کے دنیا بھر میں تقریباً 2 لاکھ 28 ہزار مستقل ملازمین تھے۔

اگر برطرفیوں کی تعداد مجموعی افرادی قوت کے 2.5 فیصد سے کم رہی تو تقریباً 5 ہزار 700 سے کم ملازمین متاثر ہوں گے۔

مصنوعی ذہانت پر سرمایہ کاری میں اضافہ

رپورٹ کے مطابق مائیکروسافٹ مصنوعی ذہانت کے بنیادی ڈھانچے پر سرمایہ کاری میں مسلسل اضافہ کررہی ہے۔

کمپنی مصنوعی ذہانت سے چلنے والی اپنی مختلف مصنوعات، کلاؤڈ سروسز اور کاروباری حل کو وسعت دے رہی ہے، جبکہ دنیا بھر میں نئے ڈیٹا سینٹرز بھی قائم کیے جا رہے ہیں تاکہ مصنوعی ذہانت سے متعلق بڑھتی ہوئی طلب پوری کی جاسکے۔

ماہرین کے مطابق انہی بڑے منصوبوں کی مالی ضروریات پوری کرنے کے لیے مائیکروسافٹ سمیت دیگر ٹیکنالوجی کمپنیاں روایتی شعبوں سے وسائل منتقل کر کے مصنوعی ذہانت، سافٹ ویئر ڈویلپمنٹ اور کلاؤڈ انفراسٹرکچر پر توجہ مرکوز کررہی ہیں۔

ایکس باکس ڈویژن میں بھی تبدیلیاں

رپورٹ کے مطابق برطرفیوں کی خبریں ایسے وقت میں سامنے آئی ہیں جب مائیکروسافٹ اپنے ایکس باکس کاروبار میں بھی متعدد تبدیلیوں پر غور کررہا ہے۔

اس سے قبل بلوم برگ نے رپورٹ کیا تھا کہ کمپنی مارکیٹنگ بجٹ میں کمی اور مزید ملازمین کو فارغ کرنے پر غور کررہی ہے، جبکہ حال ہی میں ایکس باکس کنسولز کی قیمتوں میں بھی اضافہ کیا گیا تھا، جس کی وجہ عالمی سطح پر پرزہ جات کی بڑھتی ہوئی قیمتیں بتائی گئی تھیں۔

یہ بھی پڑھیں: وکلا اور اکاؤنٹنٹس کی ملازمتیں شدید خطرے میں: مائیکروسافٹ اے آئی کے سربراہ کا انتباہ

دی انفارمیشن کی ایک رپورٹ کے مطابق مائیکروسافٹ اپنے ایکس باکس کاروبار کی تنظیمِ نو کے لیے مختلف تجاویز کا جائزہ بھی لے رہا ہے۔

اس سے پہلے بھی برطرفیاں

مائیکروسافٹ گزشتہ چند برسوں کے دوران بھی کئی مرتبہ ملازمین کی تعداد کم کرچکا ہے۔

جولائی 2025 میں کمپنی نے اپنی مجموعی افرادی قوت کے تقریباً 4 فیصد ملازمین کو فارغ کیا تھا، جو حالیہ برسوں کی بڑی برطرفیوں میں شمار کیا جاتا ہے۔

اگر تازہ اطلاعات درست ثابت ہوتی ہیں تو یہ اقدام اس بات کی نشاندہی کرے گا کہ مائیکروسافٹ مستقبل میں مصنوعی ذہانت اور کلاؤڈ ٹیکنالوجی پر اپنی توجہ مزید مرکوز رکھنا چاہتا ہے۔