عالمی منڈی میں خام تیل کی قیمتوں میں مسلسل کمی کے بعد پاکستان میں بھی پیٹرولیم مصنوعات کی قیمتوں میں مزید کمی کی توقعات بڑھ گئی ہیں، تاہم ماہرین معیشت کا کہنا ہے کہ آئندہ قیمتوں میں بڑی کمی کے امکانات کم ہیں اور عوام کو صرف معمولی ریلیف ملنے کا امکان ہے۔
عالمی سطح پر ایران اور امریکہ کے درمیان کشیدگی میں کمی اور امن معاہدے کے بعد خام تیل کی قیمتوں میں نمایاں کمی دیکھنے میں آئی ہے۔ بین الاقوامی مارکیٹ میں خام تیل کی قیمت کم ہو کر قریباً 68.8 ڈالر فی بیرل تک آ گئی ہے، جبکہ جنگ اور علاقائی کشیدگی سے قبل بھی خام تیل کی قیمت 70 ڈالر فی بیرل سے زیادہ تھی۔
عالمی منڈی میں قیمتوں میں کمی کے بعد پاکستان میں بھی پیٹرولیم مصنوعات کی قیمتوں میں نمایاں کمی کی گئی تھی۔ حکومت نے دو ہفتے قبل پیٹرول کی قیمت میں 74 روپے فی لیٹر جبکہ ہائی اسپیڈ ڈیزل کی قیمت میں 67.30 روپے فی لیٹر کمی کا اعلان کیا تھا، جس سے عوام کو بڑا ریلیف ملا تھا تاہم گزشتہ ہفتے جمعہ کے روز قیمتوں میں ردوبدل نہیں کیا گیا تھا۔
عالمی منڈی میں خام تیل کی قیمتوں میں مزید کمی ریکارڈ کی گئی ہے، جس کے باعث اب آئندہ قیمتوں کے تعین سے قبل ملک بھر میں اس بحث نے جنم لیا ہے کہ کیا حکومت پیٹرول اور ڈیزل کی قیمتوں میں مزید بڑی کمی کرے گی یا نہیں۔
ماہرین معاشیات کا کہنا ہے کہ عالمی منڈی میں خام تیل سستا ہونے کے باوجود مقامی سطح پر قیمتوں کا تعین صرف خام تیل کی قیمت کی بنیاد پر نہیں کیا جاتا بلکہ اس میں پیٹرولیم لیوی، ٹیکسز، درآمدی لاگت، ایکسچینج ریٹ اور دیگر عوامل بھی شامل ہوتے ہیں۔
ماہر معیشت ڈاکٹر خاقان نجیب نے اس حوالے سے کہا کہ حکومت نے آئی ایم ایف کے ساتھ ہونے والے معاہدے کے تحت پیٹرولیم مصنوعات پر وصول کی جانے والی پیٹرولیم لیوی کو برقرار رکھا ہوا ہے۔
ان کے مطابق حکومت اس وقت پیٹرول اور ڈیزل پر قریباً 160 روپے فی لیٹر تک مختلف مدات میں محصولات اور پیٹرولیم لیوی وصول کر رہی ہے۔ انہوں نے کہا کہ عالمی منڈی میں خام تیل کی قیمتیں گزشتہ 15 دنوں میں زیادہ کم نہیں ہوئی ہیں، جس کے باعث پاکستان میں آئندہ قیمتوں کے تعین کے دوران کمی کا امکان موجود ہے، تاہم یہ کمی محدود اور معمولی ہو سکتی ہے۔
معاشی تجزیہ کار شہباز رانا کا کہنا ہے کہ خام تیل کی قیمتوں میں نمایاں کمی ضرور ہوئی ہے اور اس کے باعث مقامی سطح پر قیمتیں کم ہونے کا امکان موجود ہے، تاہم پیٹرولیم مصنوعات کی قیمتوں کا تعین صرف خام تیل کی قیمت سے نہیں ہوتا۔
انہوں نے کہا کہ درآمدی اخراجات، روپے کی قدر، ٹیکسز، پیٹرولیم لیوی اور دیگر مالیاتی عوامل بھی قیمتوں پر اثر انداز ہوتے ہیں، اسی لیے امکان یہی ہے کہ آئندہ قیمتوں میں معمولی کمی کی جائے گی جبکہ کسی بڑی کمی کے امکانات کم دکھائی دیتے ہیں۔
ذرائع کے مطابق آئندہ 2 روز بعد ہونے والے پیٹرولیم مصنوعات کے نئے جائزے میں حکومت پیٹرول اور ہائی اسپیڈ ڈیزل کی قیمتوں میں محدود کمی کا اعلان کر سکتی ہے، تاہم حتمی فیصلہ حکومت کی جانب سے اوگرا کی سمری کی روشنی میں جمعہ کی شب کیا جائے گا۔
