امریکی ریاست اریزونا میں ڈاکٹر کی مبینہ غفلت اور لاپرواہی کا ایک سنسنی خیز اور لرزہ خیز واقعہ سامنے آیا ہے، جہاں سوئمنگ پول میں ڈوبنے والے ایک ڈیڑھ سالہ معصوم بچے کو ڈاکٹر نے مردہ قرار دے کر باڈی بیگ میں سیل کر کے اسپتال کے سرد خانے بھیج دیا، تاہم لگ بھگ 6 گھنٹے بعد وہ وہاں زندہ پایا گیا۔
پولیس ریکارڈ اور ہنگامی دستاویزی آڈیو کے مطابق، یہ واقعہ اریزونا کے شہر گلبرٹ میں پیش آیا جہاں 18 ماہ کا معصوم بچہ ‘ونسنٹ لورینزو فیورڈیلینو’ اپنے گھر کے پیچھے بنے سوئمنگ پول میں گرگیا۔
یہ بھی پڑھیں: ’بیوی زندہ ہے مگر نادرا نے مردہ قرار دے دیا‘، شہری وزیر داخلہ محسن نقوی کے سامنے پھٹ پڑا
واقعے کے فوری بعد والد نے بچے کو پانی سے نکالا اور طبی امداد دینے کی کوشش کی، جس کے بعد پیرا میڈیکس عملے نے اسے تشویشناک حالت میں ‘مرسی گلبرٹ میڈیکل سینٹر’ منتقل کیا۔ اسپتال میں بحالیِ صحت کی تمام کوششوں کے بعد وہاں تعینات ڈاکٹر آرین توسی نے بچے کی موت کی تصدیق کردی۔
بچے کو باقاعدہ باڈی بیگ (لاش رکھنے والے تھیلے) میں بند کر کے اسپتال کے سرد خانے منتقل کردیا گیا۔ حیرت انگیز طور پر تقریباً 6 گھنٹے بعد جب میری کوپا کاؤنٹی میڈیکل ایگزامینر کا ٹرانسپورٹر لاش کو منتقل کرنے کے لیے وہاں پہنچا اور اس نے بیگ کھولا، تو دیکھا کہ معصوم بچہ اب بھی سانس لے رہا تھا۔ بچے کو فوری طور پر ایمرجنسی وارڈ لے جایا گیا اور بعد ازاں فضائی ایمبولینس کے ذریعے فینکس چلڈرن اسپتال منتقل کیا گیا۔
یہ بھی پڑھیں: مردہ قرار دی گئی خاتون 2 گھنٹے بعد زندہ ہوگئی
تازہ ترین انکشافات اور غیر سیل شدہ پولیس ریکارڈ کے مطابق بچے کو مردہ خانے بھیجنے سے قبل اسپتال کی ایک رجسٹرڈ نرس نے ڈاکٹر کو بتایا تھا کہ وہ بچے کی نبض محسوس کرسکتی ہے۔
موقع پر موجود پولیس افسران نے بھی اشارہ دیا تھا کہ بچہ حرکت کررہا ہے اور اس کے سانس لینے کی آوازیں آرہی ہیں، تاہم ڈاکٹر نے نرس اور پولیس کے انتباہ کو یہ کہہ کر مسترد کر دیا کہ یہ موت کے بعد کے اضطراری سانس ہیں اور بچے کو سرد خانے منتقل کرنے کے احکامات جاری کیے۔
یہ بھی پڑھیں: اڑیسہ ٹرین حادثہ: بوڑھے باپ کی ضد بیٹے کو مردہ خانے سے زندہ نکال لائی
اگرچہ معصوم ونسنٹ اس خوفناک مرحلے سے تو گزر گیا، لیکن اس کے خاندان کے مطابق اس کے سنگین اور تباہ کن نتائج سامنے آئے ہیں۔ کئی گھنٹوں تک آکسیجن کی شدید کمی اور سرد خانے کی سخت ٹھنڈک کی وجہ سے بچے کا دماغ مستقل اور شدید طور پر متاثر ہوا ہے۔ اب اسے زندگی بھر انتہائی نگہداشت کی ضرورت رہے گی، جس کے طبی اخراجات کے لیے اہلخانہ نے فنڈز کی اپیل کی ہے۔
دوسری جانب اسپتال انتظامیہ نے معاملے کی اندرونی تحقیقات کا آغاز کردیا ہے، تاہم ڈاکٹر کی معطلی یا برطرفی سے متعلق اسپتال نے مریض کی رازداری کا حوالہ دیتے ہوئے کچھ بتانے سے گریز کیا ہے۔
