پاکستان کے معروف ٹی وی اداکار عامر گیلانی نے اپنی 30ویں سالگرہ اہلیہ اور اداکارہ ماورا حسین، والدین اور بہن کے ہمراہ سادگی سے منائی، جس کی تصاویر اور یادگار لمحات انہوں نے سوشل میڈیا پر مداحوں کے ساتھ شیئر کیے۔
سالگرہ کی تقریب میں عامر گیلانی نے نیلے رنگ کے شارٹس اور کریم رنگ کی شرٹ پہن رکھی تھی، جبکہ ماورا حسین کریم رنگ کی پینٹ اور ہلکے نیلے رنگ کی کاٹن شرٹ میں نظر آئیں۔
یہ بھی پڑھیں:انڈیا نے کن پاکستانیوں کے سوشل میڈیا اکاؤنٹس چپکے سے بحال کردیے؟
عامر گیلانی نے اپنی 30ویں سالگرہ کے موقع پر 4 منفرد اور خصوصی انداز کے کیک کاٹے۔ ان میں سے ایک کیک پر ان کے مقبول ڈراما ’زنجیریں‘ کے آخری منظر کی تصویر بنائی گئی تھی، جس میں ان کے کردار کو ناظرین کی جانب سے بے حد سراہا گیا تھا۔
اداکار نے سالگرہ کی تصاویر شیئر کرتے ہوئے 30 برس کے ہونے پر اپنی خوشی کا اظہار کیا اور اپنے اہلِ خانہ اور دوستوں کی محبت پر شکریہ ادا کیا۔ انہوں نے اپنی اہلیہ ماورا حسین کے نام ایک محبت بھرا پیغام بھی شیئر کیا
عامر گیلانی نے اپنے فنی کیریئر کا آغاز ہم ٹی وی کے ڈراما ’ثبات‘ سے کیا، جس میں ماورا حسین کے ساتھ ان کی آن اسکرین جوڑی کو مداحوں نے بے حد پسند کیا۔
اس کے بعد وہ ’ویری فلمی‘، ’نیم‘ اور ’اگر تم ساتھ ہو‘ سمیت متعدد کامیاب ڈراموں میں اپنی اداکاری کے جوہر دکھا چکے ہیں۔
مزید پڑھیں:ڈیرہ اسماعیل خان میں ایک روزہ ادبی میلہ، اردو ناول ’کرلاہٹ‘ کی رونمائی، مشاعرہ بھی منعقد
حال ہی میں عامر گیلانی نے ڈراما سیریل ’زنجیریں‘ میں مدثر کے کردار سے غیر معمولی پذیرائی حاصل کی۔ بالخصوص ڈرامے کی آخری اقساط میں ان کی شاندار اداکاری کو ناقدین اور ناظرین دونوں نے بھرپور سراہا، جس کے بعد انہیں پاکستانی ڈرامہ انڈسٹری کے ابھرتے ہوئے نمایاں اداکاروں میں شمار کیا جا رہا ہے۔
