چیف کمشنر اور ڈپٹی کمشنر اسلام آباد کی ہدایات کے مطابق اسلام آباد ایکسائز اینڈ ٹیکسیشن ڈیپارٹمنٹ نے مالی سال 26-2025 کے دوران شاندار کارکردگی کا مظاہرہ کرتے ہوئے ریکارڈ 25 ارب 43 کروڑ روپے سے زیادہ ریونیو قومی خزانے میں جمع کرا دیا، جو محکمے کی تاریخ میں ایک اہم سنگِ میل قرار دیا جا رہا ہے۔
محکمہ ایکسائز اینڈ ٹیکسیشن اسلام آباد کے مطابق مالی سال 26-2025 کے دوران مقررہ ریونیو ہدف سے بھی زیادہ وصولیاں کی گئیں۔ ریونیو میں نمایاں حصہ گاڑیوں کی رجسٹریشن فیس، روڈ ٹیکس، ہوٹل ٹیکس، پروفیشنل ٹیکس اور دیگر مدات سے حاصل ہوا۔
اعداد و شمار کے مطابق محکمے نے 19 ارب 13 کروڑ روپے ایکسائز کی مد میں جبکہ 6 ارب 30 کروڑ روپے سے زیادہ ایف بی آر کی مد میں وصول کیے، جس کے بعد مجموعی وصولیاں 25 ارب 43 کروڑ روپے سے تجاوز کر گئیں، جو مقررہ ہدف سے بھی زیادہ ہیں۔
محکمے کے مطابق یہ غیر معمولی کامیابی مؤثر حکمت عملی، شفاف نظام، جدید ٹیکنالوجی کے استعمال، مؤثر مانیٹرنگ اور افسران و اہلکاروں کی شب و روز محنت کا نتیجہ ہے۔ عوام کو بہتر اور بروقت سہولیات کی فراہمی، ٹیکس نیٹ میں اضافہ، ڈیجیٹلائزیشن اور ریونیو ریکوری کے مؤثر اقدامات نے بھی اس کامیابی میں کلیدی کردار ادا کیا۔
محکمہ ایکسائز اینڈ ٹیکسیشن اسلام آباد نے شہریوں سے اپیل کی ہے کہ وہ اپنے تمام ٹیکسز اور گاڑیوں سے متعلق واجبات بروقت ادا کریں اور خدمات کے حصول کے لیے صرف سرکاری ذرائع استعمال کریں تاکہ شفاف، مؤثر اور عوام دوست نظام کو مزید مضبوط بنایا جا سکے۔
ڈائریکٹر ایکسائز اینڈ ٹیکسیشن اسلام آباد بلال اعظم نے کہا ہے کہ جولائی 2026 کے دوران شہری ’پاک ایپ‘ کے ذریعے ٹوکن ٹیکس جمع کروا کر 10 فیصد رعایت حاصل کر سکتے ہیں۔
بلال اعظم کا کہنا تھا کہ عوام دوست پالیسیوں اور جدید ٹیکنالوجی سے آراستہ سہولیات کی فراہمی کے باعث اسلام آباد ایکسائز اینڈ ٹیکسیشن ڈیپارٹمنٹ پر شہریوں کے اعتماد میں اضافہ ہوا ہے، اور یہی عوامی اعتماد ریکارڈ ریونیو وصولی کا باعث بنا۔
انہوں نے کہاکہ اسلام آباد ایکسائز اینڈ ٹیکسیشن ڈیپارٹمنٹ شہریوں کو مزید جدید، آسان اور مؤثر سہولیات کی فراہمی کے لیے مسلسل کوشاں ہے۔
