ویسٹ انڈیز کے خلاف آئندہ 2 ٹیسٹ میچوں کی سیریز کی تیاریوں کے سلسلے میں پاکستان ٹیسٹ ٹیم کا پری سیریز تربیتی کیمپ راولپنڈی کرکٹ اسٹیڈیم میں جاری ہے جہاں قومی کھلاڑیوں نے کوچنگ اسٹاف کی نگرانی میں بھرپور ٹریننگ کی۔
قومی ٹیسٹ اسکواڈ کے کھلاڑیوں نے تقریباً 3 گھنٹے پر مشتمل تربیتی سیشن میں حصہ لیا۔ اس دوران ہیڈ کوچ سرفراز احمد، بیٹنگ کوچ اسد شفیق اور بولنگ کوچ عمر گل نے بیٹنگ، بولنگ اور فیلڈنگ سے متعلق مختلف ڈرلز کروائیں تاکہ کھلاڑیوں کو سیریز سے قبل بھرپور انداز میں تیار کیا جا سکے۔
کیمپ کے دوران کپتان بابر اعظم سمیت تمام کھلاڑیوں نے پریکٹس وکٹوں پر طویل نیٹ سیشن میں حصہ لیا جہاں بلے بازوں نے اپنی تکنیک نکھارنے جبکہ باؤلرز نے مختلف حکمت عملیوں پر کام کیا۔
پاکستان ٹیسٹ ٹیم جمعے اور ہفتہ کو 2 روزہ انٹرا اسکواڈ سینیریو میچ بھی کھیلے گی جس کا مقصد میچ جیسی صورتحال میں کھلاڑیوں کی تیاریوں کا جائزہ لینا اور ممکنہ کمزوریوں کو دور کرنا ہے۔
پاکستان اور ویسٹ انڈیز کے درمیان آئی سی سی ورلڈ ٹیسٹ چیمپئن شپ 2025-27 کے تحت 2 ٹیسٹ میچوں کی سیریز 25 جولائی سے 10 اگست تک کھیلی جائے گی۔ پہلا ٹیسٹ برائن لارا کرکٹ اکیڈمی، ٹوروبا جبکہ دوسرا ٹیسٹ کوئینز پارک اوول، پورٹ آف اسپین میں شیڈول ہے۔
قومی ٹیم کی نظریں ویسٹ انڈیز کے خلاف کامیاب آغاز پر مرکوز ہیں کیونکہ یہ سیریز ورلڈ ٹیسٹ چیمپئین شپ میں پاکستان کے لیے انتہائی اہمیت کی حامل ہے۔
