انگلینڈ اور آئرلینڈ سے شرمناک شکست، سابق کھلاڑیوں نے بھارتی کرکٹ ٹیم کو آڑے ہاتھوں لے لیا

ٹی20 ورلڈ کپ چیمپیئن بھارت کو انگلینڈ اور آئرلینڈ کے خلاف مسلسل 2 سیریز میں شکست کے بعد سابق کھلاڑیوں اور ماہرین نے بھارتی بیٹنگ کی کارکردگی پر تشویش کا اظہار کیا ہے، اور انہیں آڑے ہاتھوں لیا ہے۔

انگلینڈ نے ساؤتھمپٹن میں کھیلے گئے پانچویں اور آخری ٹی20 میچ میں بھارت کو 56 رنز سے شکست دے کر سیریز 0-4 سے اپنے نام کرلی۔ سیریز کا پہلا میچ بارش کے باعث بے نتیجہ رہا تھا۔

انگلینڈ کے خلاف شکست سے قبل آئرلینڈ نے بھی گزشتہ ماہ بھارت کو 2 میچوں کی ٹی20 سیریز میں 0-2 سے وائٹ واش کیا تھا۔

بھارتی بیٹنگ ردھم میں نظر نہیں آئی، دنیش کارتک

سابق بھارتی کھلاڑی اور کمنٹیٹر دنیش کارتک نے کہاکہ پورے دورے کے دوران بھارتی بیٹنگ یونٹ ردھم سے محروم دکھائی دیا۔

انہوں نے کرکٹ ویب سائٹ کرک بز سے گفتگو کرتے ہوئے کہا کہ بھارتی کھلاڑیوں کو اضافی باؤنس کے مطابق خود کو ڈھالنے میں مشکل پیش آرہی ہے۔

دنیش کارتک کا کہنا تھا کہ بھارتی ٹیم کا مڈل آرڈر غیر مستحکم اور اعتماد سے محروم دکھائی دے رہا ہے۔ یہ وہ بھارتی ٹیم نہیں جو ورلڈ کپ یا اس سے قبل دوطرفہ سیریز میں حریف ٹیموں پر حاوی رہتی اور ان میں خوف پیدا کرتی تھی۔

مختلف کنڈیشنز سے ہم آہنگ نہ ہوسکے، شریاس آئیر

بھارتی کپتان شریاس آئیر نے کہاکہ مختلف کنڈیشنز کے مطابق خود کو نہ ڈھال پانا سیریز میں شکست کی بڑی وجہ بنا۔

انہوں نے صحافیوں سے گفتگو کرتے ہوئے کہاکہ بھارتی ٹیم مسلسل ایک مقام سے دوسرے مقام پر جاتی رہی اور اسے گراؤنڈز کے سائز اور مختلف کنڈیشنز سمیت کئی چیلنجز کا سامنا کرنا پڑا۔

شریاس آئیر کے مطابق ٹیم توقع کے مطابق جلد خود کو ان حالات سے ہم آہنگ نہیں کرسکی۔ انہیں جون میں بھارتی ٹی20 ٹیم کا کپتان مقرر کیا گیا تھا۔

بیٹنگ کو ذمہ داری ادا کرنا ہوگی، سنیل گواسکر

بھارت کے سابق عظیم بلے باز سنیل گواسکر نے کہا کہ پوری سیریز کے دوران بھارتی بیٹنگ کے حوالے سے خدشات موجود رہے۔

انہوں نے کہا کہ بیٹنگ کو اپنی ذمہ داری ادا کرنا ہوگی کیونکہ یہ بھارتی ٹیم کا سب سے مضبوط شعبہ ہے۔ جب ٹیم کا مضبوط ترین شعبہ ہی اچھی کارکردگی نہ دکھائے تو اس کا اثر بولنگ اور فیلڈنگ پر بھی پڑتا ہے۔

شکست بھارت کے لیے ویک اپ کال قرار

معروف کمنٹیٹر ہرشا بھوگلے نے انگلینڈ کے خلاف شکست کو بھارت کے لیے ویک اپ کال قرار دیا۔

انہوں نے کہاکہ انگلینڈ نے بھارت کو اسی طرز کی کرکٹ کھیل کر شکست دی جسے بھارت اپنا انداز سمجھتا تھا۔ اگر بھارتی ٹیم اس نتیجے کو اپنی خامیوں کی نشاندہی کے طور پر قبول کرتی ہے تو اس سے بہتری کے کئی مواقع پیدا ہوسکتے ہیں۔

بھارتی ٹیم اب منگل سے انگلینڈ کے خلاف 3 ایک روزہ بین الاقوامی میچوں کی سیریز کھیلے گی۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں