ازبکستان کے نائب وزیراعظم جمشید کھوجایف اعلیٰ سطح کے کاروباری وفد کے ہمراہ 20 اور 21 جولائی کو پاکستان کا 2 روزہ دورہ کریں گے۔
اس دورے کا بنیادی مقصد دونوں برادر ممالک کے درمیان تجارتی اور اقتصادی تعلقات کو فروغ دینا اور اگلے 5 سالہ تعاون کے نفاذ کے منصوبے پر دستخط کرنا ہے۔
5 سالہ تجارتی روڈ میپ اور مفاہمتی یادداشتوں کی منظوری
وزارتِ اقتصادی امور کی جانب سے جاری کردہ اعلامیے کے مطابق وفاقی وزیرِ اقتصادی امور احد چیمہ کی زیرِ صدارت ایک اعلیٰ سطح کا مشاورتی اجلاس منعقد ہوا، جس میں اس اہم دورے کی تیاریوں کا جائزہ لیا گیا۔
یہ بھی پڑھیں:پاکستان اور ازبکستان کا تجارت سمیت مختلف شعبوں میں تعاون بڑھانے پر اتفاق
دورے کے دوران دونوں ممالک ’تجارتی و اقتصادی تعاون کے 5 سالہ روڈ میپ‘ پر دستخط کریں گے، جو سرمایہ کاری، علاقائی روابط اور معاشی تعاون کو بڑھانے کے لیے ایک جامع فریم ورک فراہم کرے گا۔
اس کے علاوہ متعدد شعبوں میں تعاون کے معاہدوں اور مفاہمتی یادداشتوں کو بھی حتمی شکل دے دی گئی ہے۔
ریلوے اور مواصلاتی رابطوں میں بہتری کے لیے دور رس تجاویز
اجلاس کے دوران سیکریٹری ریلوے، ڈائریکٹر جنرل نیشنل لاجسٹکس کارپوریشن اور وزارتِ مواصلات کے حکام نے دونوں ممالک کے درمیان تجارتی راستوں کی گنجائش اور کارکردگی کو بڑھانے کے لیے تفصیلی بریفنگ دی۔
اجلاس میں سڑک اور ریل کے رابطوں کو بہتر بنانے، نئے ٹرانسپورٹ کوریڈورز کی ترقی اور لاجسٹکس کے بنیادی ڈھانچے کو مضبوط بنانے پر غور کیا گیا تاکہ تجارتی سامان کی سستی اور تیز رفتار نقل و حمل کو یقینی بنایا جا سکے۔
100 سے زیادہ ازبک کمپنیوں کی بی ٹو بی فورم میں شرکت
دورے کے دوران اسلام آباد میں ایک وسیع پیمانے پر ’بزنس ٹو بزنس‘ فورم کا انعقاد کیا جائے گا، جس میں ازبکستان کی 100 سے زیادہ معروف کمپنیاں شرکت کریں گی۔
مزید پڑھیں:پاکستان اور ازبکستان کا خطے میں امن و استحکام کے لیے تعاون بڑھانے پر اتفاق
یہ کمپنیاں پاکستان میں زراعت، فارماسیوٹیکل (ادویات سازی)، صنعت، ٹرانسپورٹ اور لاجسٹکس جیسے اہم شعبوں میں مشترکہ منصوبوں اور سرمایہ کاری کے مواقع تلاش کریں گی۔
وفاقی وزیر احد چیمہ نے تمام متعلقہ وزارتوں اور محکموں کو ہدایت کی ہے کہ وہ باہمی ہم آہنگی کے ساتھ تمام انتظامات کو بروقت مکمل کریں۔
انہوں نے کہا کہ یہ دورہ دونوں ممالک کے درمیان پوشیدہ تجارتی صلاحیتوں کو بروئے کار لانے اور معاشی تعلقات کو مزید گہرا کرنے کا ایک بہترین موقع ثابت ہوگا۔
