الیکشن کمیشن آف پاکستان نے سوشل میڈیا پر آزاد کشمیر کے انتخابات سے متعلق اپنے نام سے گردش کرنے والی جعلی پریس ریلیز کی تردید کرتے ہوئے اسے بے بنیاد اور گمراہ کن قرار دے دیا۔
الیکشن کمیشن آف پاکستان کے ترجمان کے مطابق سوشل میڈیا پر الیکشن کمیشن آف پاکستان سے منسوب آزاد کشمیر کے انتخابات سے متعلق ایک جعلی پریس ریلیز گردش کررہی ہے، جبکہ الیکشن کمیشن نے ایسی کوئی پریس ریلیز جاری نہیں کی۔
یہ بھی پڑھیں: الیکشن کمیشن آزاد کشمیر نے انتخابات ملتوی ہونے کی خبر جعلی قرار دے دی
اعلامیے میں واضح کیا گیا کہ آزاد کشمیر کے انتخابات کا انعقاد الیکشن کمیشن آف پاکستان کے دائرۂ اختیار میں نہیں آتا۔ عوام سے اپیل کی گئی ہے کہ الیکشن کمیشن سے متعلق معلومات صرف سرکاری ذرائع سے حاصل کریں۔
اس سے قبل الیکشن کمیشن آزاد جموں و کشمیر کے ترجمان نے بھی اس سے قبل الیکشن کمیشن آف پاکستان کے لیٹر ہیڈ پر گردش کرنے والے ایک جعلی مراسلے کی سختی سے تردید کی تھی، جس میں آزاد جموں و کشمیر کے عام انتخابات ملتوی ہونے کا دعویٰ کیا گیا تھا۔
ترجمان نے کہا تھا کہ مذکورہ مراسلے کا نہ تو الیکشن کمیشن آف پاکستان اور نہ ہی الیکشن کمیشن آزاد جموں و کشمیر سے کوئی تعلق ہے۔
یہ بھی پڑھیں: آزاد کشمیر: ایل اے 24 سدھنوتی کے انتخابات امیدوار کے انتقال پر ملتوی
الیکشن کمیشن آزاد جموں و کشمیر نے واضح کیا تھا کہ عام انتخابات اپنے مقررہ وقت پر جاری انتخابی شیڈول کے مطابق منعقد ہوں گے۔ انتخابی پروگرام میں کسی بھی قسم کی تبدیلی کی صورت میں اس کا اعلان صرف الیکشن کمیشن کے مجاز اور سرکاری نوٹیفکیشن کے ذریعے کیا جائے گا۔
الیکشن کمیشن آزاد جموں و کشمیر نے سیاسی جماعتوں، امیدواروں، میڈیا نمائندگان اور عوام سے اپیل کی تھی کہ غیر مصدقہ اطلاعات پر یقین نہ کریں اور صرف سرکاری ذرائع سے جاری معلومات پر اعتماد کریں۔
