بالی ووڈ کے سپر اسٹار سلمان خان کاکروچ جنتا پارٹی (سی جے پی) کی قیادت میں ہونے والے طلبا کے احتجاج کی حمایت میں سامنے آگئے۔
ایکس پر جاری بیان میں بھارتی اداکار نے طلبہ کے احتجاج کے دوران پیش آنے والے پرتشدد واقعات پر گہرے دکھ اور افسوس کا اظہار کرتے ہوئے کہا ہے کہ یہ ایک نہایت پُرامن تحریک تھی اور یہ دیکھ کر دل بہت دکھا کہ یہ پرتشدد رخ اختیار کر گئی۔ جن طلبہ اور ان کے اہلِ خانہ کو اس دوران تکلیف یا نقصان پہنچا، میری دلی ہمدردیاں ان کے ساتھ ہیں۔
It was such a peaceful movement, feel so sad that it had to take a violent turn. My heart goes out to the students and their families who were hurt. Paper leak is a very serious issue, and I am glad to know n see that the kids of our country have come together for a better…
— Salman Khan (@BeingSalmanKhan) July 22, 2026
انہوں نے کہا کہ پرچہ لیک ہونا ایک نہایت سنگین مسئلہ ہے اور یہ خوش آئند بات ہے کہ ملک بھر کے طلبہ بہتر تعلیمی نظام کے مطالبے کے لیے متحد ہوئے جبکہ والدین نے بھی ان کا بھرپور ساتھ دیا۔
اداکار کے مطابق طلبہ نے اپنے مستقبل اور معیاری تعلیم کے لیے جس عزم، خلوص اور محنت کا مظاہرہ کیا ہے وہ قابلِ ستائش ہے۔ ان کا کہنا تھا کہ یہ احتجاج مکمل طور پر پرامن تھا اور طلبہ نے انتہائی ذمہ داری کے ساتھ اپنے مطالبات پیش کیے جو ان کی بہادری اور تعلیم سے وابستگی کا ثبوت ہے۔
یہ بھی پڑھیں: سلمان خان بڑی بیماری کا شکار ہوگئے؟ لوگوں کے بڑھتے سوال پر بالی ووڈ اداکار نے کیا جواب دیا؟
انہوں نے زور دے کر کہا کہ یہ معاملہ صرف طلبہ اور تعلیمی نظام کے درمیان ہے اس لیے اسے سیاسی رنگ نہیں دیا جانا چاہیے۔ ان کے مطابق اس تحریک کا اصل کریڈٹ صرف طلبہ کو ملنا چاہیے جبکہ حکومت کو بھی ان کے مطالبات سن کر تعلیمی نظام کو مزید مضبوط بنانے کے لیے مؤثر اقدامات کرنے چاہییں۔
اداکارنے کہا کہ تعلیم کو ہی اگلا رجحان، اگلا فیشن اور سب سے بڑی ترجیح بننا چاہیے اور ہر گزرتے سال کے ساتھ اس کی اہمیت اور مقبولیت میں اضافہ ہونا چاہیے یہاں تک کہ دنیا بھر سے طلبہ تعلیم حاصل کرنے کے لیے بھارت آئیں اور بھارت ایک عالمی تعلیمی مرکز بن جائے۔
