نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشنز سینٹر نے ملک بھر میں دریاؤں اور ندی نالوں کی تازہ صورتحال جاری کرتے ہوئے آئندہ 24 سے 48 گھنٹوں کے دوران مختلف علاقوں میں سیلاب اور اچانک طغیانی کے خدشے سے خبردار کیا ہے۔
این ڈی ایم اے کے مطابق دریائے چناب میں خانکی، قادرآباد، چنیوٹ پل اور وزیرآباد کے پلکھو نالہ میں درمیانے درجے کا سیلاب ریکارڈ کیا گیا ہے۔
یہ بھی پڑھیں: بارشوں کا نیا سلسلہ، پنجاب اور سندھ کے متعدد اضلاع کے لیے موسلادھار بارش کا انتباہ
جبکہ دریائے سندھ میں کالاباغ، چشمہ اور تونسہ، دریائے چناب میں مرالہ اور تریموں، دریائے راوی میں بلوکی اور سدھنائی، اور دریائے کابل میں نوشہرہ کے مقام پر نچلے درجے کے سیلاب کی صورتحال برقرار ہے۔
ڈی جی خان اور راجن پور کے پہاڑی نالے فی الحال معمول کے مطابق بہہ رہے ہیں۔
🚨🇵🇰 Flood situation worsens as the Chenab hits Pakistan.
A major breach in a protective embankment on the Chenab River near Parara Beit, Liaquatpur, Punjab, has unleashed floodwaters into nearby settlements. pic.twitter.com/5e7b4vKyfF
— Ary Sangwan (@Arysangwan) July 25, 2026
ادارے نے پیش گوئی کی ہے کہ آئندہ 24 گھنٹوں کے دوران دریائے چناب میں مرالہ، خانکی، قادرآباد اور چنیوٹ پل پر پانی کے بہاؤ میں مزید اضافہ ہوگا، جبکہ تریموں بیراج پر بھی پانی کی سطح درمیانے درجے کے سیلاب تک پہنچ سکتی ہے۔
این ڈی ایم اے کے مطابق آئندہ 24 سے 48 گھنٹوں کے دوران ڈی جی خان کے پہاڑی ندی نالوں، خیبرپختونخوا کے برساتی ندی نالوں اور شمالی بلوچستان میں فلیش فلڈنگ کا خدشہ ہے۔
اسی عرصے میں گوجرانوالہ، منڈی بہاؤالدین، سیالکوٹ، نارووال، فیصل آباد، سرگودھا، جھنگ، ملتان، حافظ آباد اور لاہور کے شہری علاقوں میں اربن فلڈنگ کا امکان بھی ظاہر کیا گیا ہے۔
PMD Daily Flood Bulletin | 25 July 2026
River Chenab at Khanki, Qadirabad & Chiniot Bridge in medium flood level. Southeastern Sindh may face pluvial flooding in the next 24–36 hours, while flash flooding is expected in hill torrents of D.G. Khan & NE Balochistan.
Page 2 of 2 pic.twitter.com/4wjLyZ2jTo— Pak Met Department محکمہ موسمیات (@pmdgov) July 25, 2026
اتھارٹی نے عوام کو متاثرہ علاقوں کا غیر ضروری سفر نہ کرنے، سیلابی پانی یا تیز بہاؤ کو پیدل یا گاڑی کے ذریعے عبور نہ کرنے اور سفر سے قبل موسم اور سڑکوں کی صورتحال معلوم کرنے کی ہدایت کی ہے۔
پہاڑی علاقوں میں لینڈ سلائیڈنگ اور ملبے کے ریلوں کے خدشے کے پیش نظر خطرناک مقامات سے دور رہنے کی بھی تاکید کی گئی ہے۔
مزید پڑھیں: راول جھیل خطرے میں؟ کیا اسلام آباد کا یہ اہم آبی ذخیرہ بھی آلودہ نالے میں تبدیل ہو رہا ہے؟
این ڈی ایم اے نے تمام صوبائی اور ضلعی اداروں کو حساس مقامات کی مسلسل نگرانی، ہنگامی ٹیموں کی تیاری، بند شاہراہوں کی فوری بحالی اور ممکنہ موسمی صورتحال سے نمٹنے کے لیے مکمل الرٹ رہنے کی ہدایت کی ہے۔
اتھارٹی نے شہریوں سے اپیل کی ہے کہ وہ بروقت اطلاعات کے لیے پاک این ڈی ایم اے ڈیزاسٹر الرٹ ایپ سے استفادہ کریں۔
