آزاد جموں و کشمیر قانون ساز اسمبلی کے عام انتخابات کے پہلے مرحلے میں 27 جولائی کو میرپور ڈویژن کے 13 حلقوں میں پولنگ ہوگی، جہاں مجموعی طور پر 288 امیدوار انتخابی میدان میں موجود ہیں۔
الیکشن کمیشن کی جانب سے تمام امیدواروں کے نام اور انتخابی نشانات بیلٹ پیپرز پر درج کر دیے گئے ہیں۔
الیکشن کمیشن کے مطابق انتخابی مہم کی مقررہ مدت ختم ہونے کے بعد جلسوں، جلوسوں اور کارنر میٹنگز پر مکمل پابندی عائد کر دی گئی ہے۔ کمیشن نے خبردار کیا ہے کہ ضابطہ اخلاق کی خلاف ورزی کرنے والوں کے خلاف قانونی کارروائی عمل میں لائی جائے گی۔
میرپور، بھمبر اور کوٹلی کے حلقوں میں امیدواروں کی تعداد
اعداد و شمار کے مطابق ضلع میرپور کے حلقہ ایل اے ایک ڈڈیال سے 20 امیدوار مدمقابل ہیں، حلقہ ایل اے 2 چکسواری و اسلام گڑھ سے 24 امیدوار انتخاب لڑ رہے ہیں، جبکہ حلقہ ایل اے 3 میرپور سٹی میں سب سے بڑا مقابلہ متوقع ہے، جہاں 34 امیدوار میدان میں ہیں۔ اسی طرح حلقہ ایل اے 4 کھڑی شریف سے 20 امیدوار انتخابی دوڑ میں شامل ہیں۔
ضلع بھمبر میں حلقہ ایل اے 5 برنالہ سے 18 امیدوار، حلقہ ایل اے 6 سماہنی سے 17 امیدوار جبکہ حلقہ ایل اے 7 بھمبر تین سے 28 امیدوار مد مقابل ہیں۔
ضلع کوٹلی میں حلقہ ایل اے 8 راج محل سے 19 امیدوار، حلقہ ایل اے 10 کوٹلی سٹی سے 29 امیدوار، حلقہ ایل اے 11 سہنسہ سے 24 امیدوار، حلقہ ایل اے 12 چڑہوئی سے 15 امیدوار اور حلقہ ایل اے 13 کھوئی رٹہ سے 27 امیدوار انتخابی عمل میں حصہ لے رہے ہیں۔
فتح پور تھکیالہ میں سب سے کم امیدوار، انتظامات مکمل
الیکشن کمیشن کے مطابق حلقہ ایل اے 9 فتح پور تھکیالہ میں سب سے کم 12 امیدوار میدان میں ہیں، جس کے باعث یہ حلقہ کم ترین امیدواروں والا حلقہ قرار پایا ہے۔
الیکشن کمیشن نے کہا ہے کہ آزاد، منصفانہ اور شفاف انتخابات کے انعقاد کے لیے تمام انتظامات مکمل کر لیے گئے ہیں، جبکہ سیکیورٹی کے سخت انتظامات کے ساتھ پولنگ اسٹاف کی تعیناتی کا عمل بھی تیزی سے جاری ہے۔
