ایپل کے طویل عرصے سے زیرِ گردش اسمارٹ چشمے آخرکار حقیقت کا روپ دھار سکتے ہیں۔ تازہ اطلاعات کے مطابق کمپنی انہیں جون 2027 میں ہونے والی ورلڈ وائیڈ ڈویلپرز کانفرنس کے دوران متعارف کرا سکتی ہے۔ معروف ٹیک تجزیہ کار مارک گورمین کے مطابق ان چشموں کا اندرونی کوڈ نام این 50 رکھا گیا ہے۔
یہ بھی پڑھیں: ایپل کے اسمارٹ چشموں کی رونمائی مؤخر، 2027 کے آخر میں متوقع
رپورٹ کے مطابق ابتدائی منصوبہ یہ تھا کہ یہ اسمارٹ چشمے 2026 میں پیش کیے جائیں، تاہم کیمرے سے لیس چشموں کے حوالے سے رازداری کے خدشات کے باعث کمپنی نے ان کی رونمائی مؤخر کر دی تاکہ صارفین کی نجی معلومات کے تحفظ کو مزید بہتر بنایا جاسکے۔
اطلاعات کے مطابق ایپل کے اسمارٹ چشموں کی متوقع قیمت 200 سے 500 امریکی ڈالر کے درمیان ہوگی۔ یہ چشمے مختلف فریم ڈیزائنز میں دستیاب ہوں گے، جبکہ ان میں بیضوی شکل کے کیمرے نصب کیے جانے کا امکان ہے۔ کمپنی انہیں اپنی ویژن مصنوعات کے شعبے کے تحت متعارف کرائے گی۔
یہ بھی پڑھیں: گوگل کا پھر اسمارٹ چشمے لانے کا اعلان، کیا یہ کاوش کامیاب ہوجائے گی؟
رپورٹ میں کہا گیا ہے کہ ایپل اس منصوبے میں رازداری کو اولین ترجیح دے رہا ہے۔ اسی مقصد کے تحت کمپنی نے ایسے نمونے بھی تیار کیے ہیں جن میں کیمرہ شامل نہیں، تاکہ ماضی میں ایئر ٹیگز کے غلط استعمال جیسے خدشات سے بچا جاسکے۔
ابتدائی نسل کے ان اسمارٹ چشموں میں لینس کے اندر آگمینٹڈ ریئلٹی ڈسپلے شامل نہیں ہوگا، جبکہ کیمرے کے حتمی استعمال سے متعلق فیصلہ ابھی زیرِ غور ہے۔
دوسری جانب مارک گورمین کے مطابق ایپل کی نئی اسمارٹ گھڑیوں کی تیاری آخری مراحل میں داخل ہو چکی ہے۔ اطلاعات ہیں کہ واچ سیریز 12 کے وائی فائی اور ایل ٹی ای ماڈلز کے ساتھ واچ الٹرا 4 بھی جلد متعارف کرائی جاسکتی ہے۔
یہ بھی پڑھیں: ایمیزون نے ڈرائیورز کے لیے اے آئی اسمارٹ چشمے متعارف کرا دیے
رپورٹ کے مطابق نئی گھڑیوں کے ظاہری ڈیزائن میں بڑی تبدیلی متوقع نہیں، تاہم ان میں نیا پروسیسر اور صحت و فٹنس سے متعلق بہتر خصوصیات شامل کیے جانے کا امکان ہے۔ البتہ اس سال نئی واچ ایس ای پیش کیے جانے کی توقع نہیں، کیونکہ اس کا تیسرا ماڈل 2025 میں متعارف کرایا جاچکا ہے۔
