اداکارہ کبریٰ خان نے کہا ہے کہ پاکستانی معاشرے اور شوبز انڈسٹری میں خوبصورتی کے لیے ایک مخصوص معیار بنا دیا گیا ہے، جس میں ہر خاتون فٹ نہیں بیٹھ سکتی اور وہ خود بھی اس معیار پر پوری نہیں اترتیں۔
اداکارہ نے مالیحہ رحمان کو دیے گئے ایک انٹرویو میں کہا کہ ہمارے معاشرے میں خوبصورتی کے لیے گورا رنگ، بہت کم وزن، لمبا قد اور لمبے بال جیسے پیمانے مقرر کر دیے گئے ہیں، جس کی وجہ سے بہت سی خواتین خود کو ناکافی سمجھنے لگتی ہیں۔
یہ بھی پڑھیں: ’تم روایتی بیوی بن گئی ہو‘، گوہر رشید نے کبریٰ خان کو ایسا کیوں کہا؟
کبریٰ خان نے کہا کہ وہ بھی اس مرحلے سے گزری ہیں جہاں ان کی خوبصورتی کو انہی روایتی پیمانوں سے جانچا گیا، جس کے ان پر اثرات بھی پڑے، تاہم اب انہوں نے خود کو دوسروں کے معیار پر پرکھنے کے بجائے اپنی ذات کو قبول کرنا سیکھ لیا ہے۔
انہوں نے سوشل میڈیا پر تنقید سے متعلق کہا کہ ہر شخص کو اپنی رائے رکھنے کا حق ہے، لیکن کسی کو یہ حق حاصل نہیں کہ وہ اپنی رائے کی آڑ میں دوسروں کو ذہنی طور پر نقصان پہنچائے یا انہیں تضحیک کا نشانہ بنائے۔
یہ بھی پڑھیں: کبریٰ خان اور گوہر رشید کی شادی، تصاویر وائرل
اداکارہ نے بتایا کہ بعض اوقات ان کے کردار پر ہونے والی تنقید ذاتی حملوں میں تبدیل ہو جاتی ہے، حالانکہ ڈرامے کے کردار اور حقیقی زندگی میں فرق ہوتا ہے۔
کبریٰ خان کے مطابق انہوں نے وقت کے ساتھ تنقید برداشت کرنا سیکھ لیا ہے، لیکن اس کا یہ مطلب نہیں کہ سخت تبصرے انسان کو متاثر نہیں کرتے۔
