معروف اداکار، مصنف اور تھیٹر ہدایت کار یاسر حسین ایک بار پھر اسٹیج پر واپسی کر رہے ہیں، ان کا نیا اسٹیج ڈراما ’سو سویٹ‘ جلد لاہور میں پیش کیا جائے گا۔
یاسر حسین نے منگل کے روز انسٹاگرام پر اپنی نئی تھیٹر پروڈکشن کا اعلان کرتے ہوئے بتایا کہ یہ ڈراما لاہور کے الحمراء آرٹس کونسل میں جلد پیش کیا جائے گا۔
یہ بھی پڑھیں: شادی کی تقریب میں حد سے زیادہ بے تکلفی، ہانیہ عامر اور یاسر حسین کی ویڈیوز وائرل
اعلان کے مطابق ’سو سویٹ‘ پنجاب محکمہ اطلاعات و ثقافت کا منصوبہ ہے، جس کے مصنف اور ہدایت کار یاسر حسین خود ہیں۔ تاہم ڈرامے کی دیگر تفصیلات ابھی سامنے نہیں آئیں۔ ان کے گزشتہ ڈرامے کو دیکھتے ہوئے امکان ظاہر کیا جارہا ہے کہ وہ اس میں مرکزی کردار بھی ادا کرسکتے ہیں۔
یاسر حسین کا یہ نیا ڈراما ان کی گزشتہ کامیاب تھیٹر پروڈکشن ’منکی بزنس‘ کے بعد پیش کیا جارہا ہے، جسے کراچی، لاہور اور اسلام آباد کے شائقین کی جانب سے بھرپور پذیرائی ملی تھی۔ اس مقبولیت کے باعث ڈرامے کو کراچی میں ابتدائی نمائش کے بعد دسمبر میں دوبارہ بھی پیش کیا گیا۔
View this post on Instagram
’منکی بزنس‘ شوبز انڈسٹری کے پس منظر میں بنائی گئی ایک مزاحیہ کہانی تھی، جس میں یاسر حسین نے وسیم نامی ایک بدقسمت اداکار کا کردار ادا کیا تھا، جو ایک فلاحی اسکیم سے فائدہ اٹھانے کے لیے جعلی چوٹ کا بہانہ بناتا ہے۔
یہ بھی پڑھیں: اداکار یاسر حسین شرکا کے کون سے سوال پر شرما گئے
ڈرامے میں اس وقت مزاحیہ صورتحال پیدا ہوتی ہے جب ایک انسپکٹر وسیم کے دعوے کی تصدیق کے لیے پہنچتا ہے، جہاں اس کی اہلیہ کے پینٹر ہونے اور بہری ہونے کے دعوے بھی شامل ہوتے ہیں، جبکہ حقیقت مختلف ہوتی ہے۔
یاسر حسین نے ’سو سویٹ‘ کو اپنی اب تک کی ’’سب سے زیادہ افراتفری، مزاحیہ اور شاندار پروڈکشن‘‘ قرار دیا ہے، جس سے اندازہ ہوتا ہے کہ یہ ڈراما بھی شائقین کو ہنسانے کے لیے تیار ہے۔ امکان ہے کہ لاہور کے بعد اسے ملک کے دیگر شہروں میں بھی پیش کیا جائے گا۔
