پاکستان کے معروف اداکار فواد خان کی تازہ تصاویر سوشل میڈیا پر وائرل ہونے کے بعد ان کے نئے انداز اور ممکنہ کاسمیٹک تبدیلیوں سے متعلق قیاس آرائیاں زور پکڑ گئی ہیں۔
فواد خان ان دنوں اداکارہ عائزہ خان کے ساتھ اپنی نئی فلم کی شوٹنگ میں مصروف ہیں جس میں وہ سیکیورٹی فورسز کے ایک افسر کا کردار ادا کر رہے ہیں۔ کردار کے تقاضوں کے مطابق انہوں نے اپنے بال مختصر کروا لیے ہیں جس کے باعث ان کی شخصیت میں واضح تبدیلی دیکھی جا رہی ہے۔
یہ بھی پڑھیں: فواد خان کے ساتھ دوستی پر ماہرہ خان کی پہلی مرتبہ کھل کر گفتگو
سوشل میڈیا پر سامنے آنے والی تصاویر کے بعد متعدد صارفین نے دعویٰ کیا کہ فواد خان نے ممکنہ طور پر بوٹوکس، فلرز یا دیگر کاسمیٹک طریقۂ علاج کروایا ہے جبکہ بعض صارفین نے ان کے چہرے کی تازگی اور نئے انداز کو سراہا۔ چند صارفین نے ان کے وزن میں نمایاں کمی کا ذکر کرتے ہوئے یہ قیاس آرائی بھی کی کہ وہ ممکنہ طور پر ذیابیطس کے علاج میں استعمال ہونے والی دوا اوزیمپک (Ozempic) استعمال کر رہے ہوں گے۔
یہ بھی کہا جا رہا ہے کہ فواد خان کو لاہور کے ایک معروف کاسمیٹک سرجن کے ساتھ مختلف مواقع پر دیکھا گیا ہے جس کے بعد ان سے متعلق یہ قیاس آرائیاں مزید بڑھ گئی ہیں۔
یہ بھی پڑھیں: فواد خان بالی ووڈ میں واپسی پر کتنا معاوضہ لے رہے ہیں؟
تاہم فواد خان یا ان کی ٹیم کی جانب سے اب تک ان خبروں یا سوشل میڈیا پر گردش کرنے والے دعوؤں کی نہ تو تصدیق کی گئی ہے اور نہ ہی تردید سامنے آئی ہے۔
واضح رہے کہ فواد خان پاکستان کے مقبول ترین اداکاروں میں شمار ہوتے ہیں۔ انہوں نے ہمسفر، زندگی گلزار ہے، داستان سمیت متعدد کامیاب ڈراموں اور خدا کے لیے اور دی لیجنڈ آف مولا جٹ جیسی کامیاب فلموں میں اپنی اداکاری کے جوہر دکھائے جبکہ بالی ووڈ فلموں خوبصورت اور کپور اینڈ سنز کے بعد بھارت میں بھی ان کی بڑی تعداد میں مداح موجود ہیں۔
