وفاقی وزیر خزانہ اسحاق ڈار نے کہا ہے کہ شیل پیٹرولیم کمپنی پاکستان میں اپنا کاروبار بند نہیں کر رہی۔ صرف شیئرز فروخت کیے جا رہے ہیں اور اس کا ملکی حالات سے کوئی تعلق نہیں۔
اسلام آباد میں پریس کانفرنس کرتے ہوئے انہوں نے کہا کہ شیل ایک اور انویسٹر کو اپنے شیئر فروخت کرنا چاہتا ہے۔ یہ کمپنی کئی ممالک میں کاروبار کر رہی ہے۔
اسحاق ڈار نے کہا کہ ریٹنگ ایجنسی کی طرف سے کہا جا رہا تھا کہ پاکستان مئی اور جون میں ادائیگیاں کیسے کرے گا تو میں نے کہا تھا کہ انتظام ہو جائے گا اور پھر ایسا ہی ہوا۔
وزیر خزانہ کا کہنا تھا کہ 2 سے 3 روز میں چینی بینکوں سے 300 ملین ڈالر آ جائیں گے۔ ہم نے 12 جون کو وقت سے قبل ادائیگی کر دی تھی جس کے بعد وہ رقم دوبارہ دے رہے ہیں۔
واضح رہے کہ بدھ 14 جون کو یہ خبریں سامنے آئی تھیں کہ ایندھن کے شعبے میں کام کرنے والے ملٹی نیشنل ادارے شیل نے پاکستان میں اپنے شیئر فروخت کرنے کا اعلان کیا ہے۔
یہ بھی پڑھیں شیل کا پاکستان میں کاروبار ختم کرنے کا اعلان؟
شیل پاکستان کی جانب سے بدھ کو بتایا گیا تھا کہ ان کے مالک ادارے نے پاکستان میں اپنے شیئر فروخت کرنے کا ارادہ ظاہر کیا ہے۔
شیل پیٹرولیم کمپنی جو کہ شیل پاکستان کا مالک ادارہ اور اس کے 77 فیصد شیئرز کا مالک ہے، 2022 میں ایکسچینج ریٹ، روپے کی قدر گرنے اور دیگر مسائل کی وجہ سے خسارے میں رہا تھا۔
شیل کی جانب سے پاکستان اسٹاک ایکسچینج اور سیکیورٹی ایکسچینج کمیشن آف پاکستان کو لکھے گئے خط میں کہا گیا تھا کہ ’شیل پاکستان کے بورڈ آف ڈائریکٹرز کی 14 جون کو ہونے والی میٹنگ کو شیل پیٹرولیم کمپنی لمیٹڈ نے اپنے شیئرز فروخت کرنے کے بارے میں بتایا ہے۔‘
خط میں یہ بھی واضح کیا گیا ہے کہ ’اس اعلان سے پاکستان میں شیل پاکستان لمیٹڈ کی جاری کاروباری سرگرمیوں پر کوئی فرق نہیں پڑے گا۔‘
شیل پاکستان کا اسٹاک ایکسچینج کو لکھا گیا خط سامنے آنے کے بعد سوشل میڈیا پر اسے ’پاکستان میں شیل کا کاروبار بند کرنے کے اعلان‘ سے تعبیر کیا گیا۔
