برطانوی شاہی خاندان کی مرحوم شہزادی ڈیانا کی ماضی میں ریکارڈ کی گئی آڈیو ٹیپس سے معلوم ہوتا ہے کہ شہزادہ چارلس (موجودہ بادشاہ چارلس سوم) کے ساتھ ہنی مون کے دوران وہ مسلسل کیملا کے خیال سے پریشان رہیں۔
یہ بھی پڑھیں: لیڈی ڈیانا اپنے چھوٹے بیٹے ہیری کے لیے فکرمند کیوں رہتی تھیں؟
غیر ملکی میڈیا رپورٹس کے مطابق یہ آڈیو ریکارڈنگز شہزادی ڈیانا نے سوانح نگار اینڈریو مورٹن کے لیے کرائی تھیں، جنہیں بعد ازاں ان کی مشہور سوانح عمری میں بھی شامل کیا گیا۔
ڈیانا کے مطابق ہنی مون کے دوران انہوں نے شہزادہ چارلس کے پاس ایک جوڑا کف لنکس دیکھا، جن پر دو آپس میں جڑے ہوئے حرف ’سی‘ بنے ہوئے تھے۔ ان کا خیال تھا کہ یہ تحفہ کیملا نے شادی سے قبل چارلس کو دیا تھا۔
یہ بھی پڑھیں: اپنی شادی پر بادشاہ چارلس اور لیڈی ڈیانا کے چپکے چپکے آنسو بہانے کا عقدہ کھل گیا
ڈیانا نے بتایا کہ جب انہوں نے چارلس سے اس بارے میں سوال کیا تو انہوں نے تصدیق کی کہ یہ تحفہ ایک دوست، یعنی کیملا، کی جانب سے تھا۔ اس بات پر دونوں کے درمیان تلخ بحث ہوئی۔
آڈیو ریکارڈنگز میں شہزادی ڈیانا نے کہا، ’ہر رات مجھے کیملا کے خواب آتے تھے۔ میں ہر وقت اسی کے بارے میں سوچتی رہتی تھی۔‘
انہوں نے کہا کہ اسی ذہنی دباؤ نے بحیرہ روم میں گزارا جانے والا ہنی مون بھی متاثر کیا اور ان کی ازدواجی زندگی کے ابتدائی مسائل اسی دوران نمایاں ہونا شروع ہوگئے تھے۔
یہ بھی پڑھیں: لیڈی ڈیانا نے پہلی ملازمت حاصل کرنے کے لیے کیا جھوٹ بولا تھا؟
دوسری جانب مختلف سوانحی کتابوں میں شہزادہ چارلس سے منسوب ایک خط کا بھی حوالہ دیا گیا ہے، جس میں انہوں نے لکھا کہ ہنی مون کے دوران ڈیانا زیادہ وقت کشتی کے عملے کے افراد سے گفتگو میں گزارتی تھیں، جبکہ وہ خود کشتی کے عرشے پر بیٹھ کر مطالعہ کرنا پسند کرتے تھے۔
