برطانوی شاہی خاندان کی معروف شخصیت شہزادی ڈیانا کو اپنے چھوٹے بیٹے شہزادہ ہیری کے مستقبل کے کردار کے حوالے سے ہمیشہ تشویش لاحق رہتی تھی۔
یہ بھی پڑھیں: حقیقی زندگی میں طلسماتی کہانی جیسا سماں باندھتی مشہور شاہی شادیاں
شاہی تجزیہ کار ایان پیلہم ٹرنر کے مطابق شہزادہ ہیری کے بڑے بھائی اور ولی عہد شہزادہ ولیم کو بچپن سے ہی خصوصی مراعات حاصل تھیں جس کے باعث ڈیانا کو خدشہ تھا کہ ہیری کا کردار پیچھے رہ جائے گا۔
انہوں نے ایک انٹرویو میں کہا کہ ڈیانا ہیری کی ذاتی تربیت اور رہنمائی پر خاص توجہ دیتی تھیں جو دراصل دونوں بیٹوں کے درمیان توازن قائم کرنے کی ایک کوشش تھی۔
ان کے مطابق ولیم بادشاہ بننے کی خواہش رکھتے تھے جبکہ ہیری نے فوج میں قیادت اور بیرون ملک اپنے خاندان کے تحفظ میں مضبوط کردار کا مظاہرہ کیا۔
یہ تبصرے اس وقت سامنے آئے جب معروف شاہی مصنف اور ڈیانا کے قریبی ساتھی رچرڈ کے نے انکشاف کیا کہ ڈیانا سمجھتی تھیں کہ ولیم اپنے مستقبل سے آگاہ تھے لیکن وہ فطری طور پر شرمیلے تھے اور اس ذمہ داری کے حوالے سے کچھ بے چینی محسوس کرتے تھے۔
مزید پڑھیے: کیا شاہ چارلس کے چھوٹے بیٹے ہیری اپنا شاہی کردار دوبارہ حاصل کرلیں گے؟
رپورٹ کے مطابق ڈیانا کے ذہن میں یہ امکان بھی موجود تھا کہ شاید مستقبل میں کنگ چارلس کے بعد ہیری اہم کردار ادا کریں۔
اسی تناظر میں وہ ہیری کو پیار سے ’گڈ کنگ ہیری‘ بھی کہا کرتی تھیں۔
ماہرین کے مطابق ڈیانا اپنے دونوں بیٹوں کے مستقبل کے حوالے سے نہایت حساس تھیں اور ان کی خواہش تھی کہ دونوں کو مناسب مقام اور کردار ملے۔
مزید پڑھیں: شاہ چارلس کا چھوٹے بیٹے اور بہو پر اپنے گھر کے دروازے کھول دینے پر سنجیدگی سے غور
واضح رہے کہ ڈیانا اور شاہ چارلس کے چھوٹے بیٹے شہزادہ ہیری اور برطانوی شاہی خاندان کے درمیان کشیدگی گزشتہ چند برسوں میں نمایاں طور پر بڑھی ہے۔
یہ اختلافات اس وقت شدت اختیار کر گئے جب ہیری اور ان کی اہلیہ میگھن مارکل نے سنہ 2020 میں شاہی ذمہ داریوں سے علیحدگی اختیار کر لی اور بعد ازاں امریکا منتقل ہو گئے۔ اس فیصلے کے بعد دونوں نے مختلف انٹرویوز اور دستاویزی پروگرامز میں شاہی خاندان کے رویے پر تنقید کی جس سے تعلقات مزید خراب ہوئے۔
یہ بھی پڑھیے: کوئین الزبتھ اول کے حکم پر سزائے موت پانے والی اسکاٹ لینڈ کی ملکہ کا آخری خط منظر عام پر
خاص طور پر شہزادہ ولیم اور کنگ چارلس کے ساتھ ہیری کے تعلقات میں سرد مہری کی اطلاعات سامنے آئیں۔ ہیری کی کتاب اور میڈیا بیانات کے بعد خاندانی اختلافات عوامی سطح پر آ گئے تاہم ماہرین کا کہنا ہے کہ وقت کے ساتھ مفاہمت کے امکانات موجود رہتے ہیں اگرچہ فی الحال دونوں جانب فاصلے برقرار ہیں۔
