راول ڈیم میں پانی کی سطح مقررہ حد تک پہنچنے کے بعد کھولی گئی سپل ویز ساڑھے 5 گھنٹے بعد بند کر دی گئیں۔
ضلعی انتظامیہ کے مطابق راول ڈیم کی سپل ویز ہفتہ کی صبح 6 بجے اے سی سیکرٹریٹ کی نگرانی میں کھولی گئی تھیں تاکہ اضافی پانی کا اخراج یقینی بنایا جا سکے۔
انتظامیہ کا کہنا ہے کہ ڈیم میں پانی کی سطح مقررہ حد 1747 فٹ تک پہنچنے پر سپل ویز دوبارہ بند کر دی گئیں۔ سپل ویز تقریباً ساڑھے 5 گھنٹے تک کھلی رہیں، جس کے دوران تمام حفاظتی اور احتیاطی اقدامات پر مکمل عمل درآمد کیا گیا۔
یہ بھی پڑھیں:پنجاب کے بیشتر دریاؤں میں سیلابی صورتحال معمول پر، 5 اگست تک مزید بارشوں اور فلیش فلڈنگ کا الرٹ
ضلعی انتظامیہ کے مطابق سپل ویز کھولنے سے قبل متعلقہ علاقوں میں پیشگی انتظامات مکمل کیے گئے تھے، جبکہ ریسکیو 1122، پولیس، ضلعی انتظامیہ اور دیگر متعلقہ ادارے پوری کارروائی کے دوران موقع پر موجود رہے۔
حکام نے بتایا کہ سپل ویز کھلنے کے دوران نالے میں نہانے والے ایک شخص کو حفاظتی ہدایات کی خلاف ورزی پر گرفتار بھی کیا گیا۔
ضلعی انتظامیہ نے شہریوں سے اپیل کی ہے کہ بارشوں کے موسم میں ڈیموں، نالوں اور آبی گزرگاہوں کے قریب جانے سے گریز کریں اور انتظامیہ کی جانب سے جاری کردہ حفاظتی ہدایات پر عمل کریں۔
