امریکی برآمدی پابندیوں کے مزید سخت ہونے کے خدشات کے پیش نظر جنوبی کوریا کی معروف چِپ ساز کمپنیاں سام سنگ الیکٹرانکس اور ایس کے ہائنکس چین میں اپنے کارخانوں کے لیے چینی کمپنی AMEC کے تیار کردہ چِپ سازی کے آلات کی آزمائش کر رہی ہیں۔
یہ بھی پڑھیے ایپل کا 2027 تک 5 نئے آئی فون متعارف کرانے کا منصوبہ، چین سے میموری چپس حاصل کرنے کا بھی امکان
ذرائع کے مطابق دونوں کمپنیوں نے تقریباً دو برس قبل ان آلات کی جانچ شروع کی تھی تاکہ مستقبل میں امریکی پابندیوں کے باعث سپلائی متاثر ہونے کی صورت میں متبادل ذرائع دستیاب رہیں۔ اگرچہ ابھی تک چینی آلات کو بڑے پیمانے پر اپنانے کا کوئی فیصلہ نہیں ہوا، تاہم ماہرین کا کہنا ہے کہ عالمی کمپنیوں کی جانب سے ان کی آزمائش ہی چین کی سیمی کنڈکٹر صنعت کے لیے اہم پیش رفت ہے۔
سام سنگ نے رائٹرز کو بتایا کہ اس نے اپنے چینی کارخانے میں AMEC کے آلات کی آزمائش نہیں کی، جبکہ ایس کے ہائنکس نے اس معاملے پر تبصرہ کرنے سے گریز کیا۔
یہ بھی پڑھیے ’میچ ایکٹ‘: امریکا نے چین کے چپ سیکٹر کو نشانے پر رکھ لیا
ماہرین کے مطابق امریکی ٹیکنالوجی پابندیوں نے چین کی مقامی چِپ آلات ساز کمپنیوں کے لیے نئے مواقع پیدا کیے ہیں۔ چینی آلات نسبتاً کم قیمت پر دستیاب ہیں اور ایچنگ سمیت کئی شعبوں میں ان کی صلاحیت میں نمایاں بہتری آئی ہے، تاہم عالمی سطح پر ان کے وسیع استعمال کی راہ میں منظوری کے طویل مراحل، دانشورانہ ملکیت اور سیکیورٹی سے متعلق خدشات اب بھی موجود ہیں۔
