چیئرمین سینیٹ سید یوسف رضا گیلانی نے یومِ استحصالِ کشمیر کے موقع پر بھارت کے 5 اگست 2019 کے غیرقانونی اور یکطرفہ اقدامات کی شدید مذمت کرتے ہوئے کہا ہے کہ مقبوضہ جموں و کشمیر میں انسانی حقوق کی سنگین خلاف ورزیوں پر عالمی برادری کو فوری توجہ دینی چاہیے۔
مزید پڑھیں:یومِ استحصالِ کشمیر: پاکستان اپنے اصولی مؤقف سے کبھی پیچھے نہیں ہٹے گا، خالد حسین مگسی
اپنے خصوصی پیغام میں چیئرمین سینیٹ نے کہا کہ بھارتی غیر قانونی زیرِ تسلط جموں و کشمیر میں آبادی کا تناسب تبدیل کرنے اور کشمیری شناخت کو مسخ کرنے کی کوششیں ناقابلِ قبول ہیں۔ انہوں نے کہا کہ جبر، ریاستی تشدد اور طاقت کا استعمال کشمیری عوام کی حقِ خودارادیت کی جدوجہد کو نہیں دبا سکتا۔
سید یوسف رضا گیلانی نے کہا کہ پاکستان مقبوضہ کشمیر کے عوام کی اخلاقی، سیاسی اور سفارتی حمایت ہر سطح پر جاری رکھے گا اور مسئلہ کشمیر کا منصفانہ حل صرف اقوامِ متحدہ کی سلامتی کونسل کی متعلقہ قراردادوں اور کشمیری عوام کی خواہشات کے مطابق ہی ممکن ہے۔
چیئرمین سینیٹ نے اقوامِ متحدہ اور عالمی برادری سے مطالبہ کیا کہ وہ مقبوضہ جموں و کشمیر میں بھارتی مظالم اور انسانی حقوق کی خلاف ورزیوں کا فوری نوٹس لے اور بین الاقوامی ادارے بھارت کو عالمی قوانین اور اقوامِ متحدہ کی سلامتی کونسل کی قراردادوں پر عمل درآمد کا پابند بنائیں۔
مزید پڑھیں:یومِ استحصالِ کشمیر: پاکستان کشمیری عوام کی حمایت جاری رکھے گا، اعظم نذیر تارڑ
انہوں نے کہا کہ جنوبی ایشیا میں پائیدار امن و استحکام مسئلہ کشمیر کے منصفانہ اور پائیدار حل سے وابستہ ہے۔
