وزیراعلیٰ پنجاب مریم نواز شریف نے مظلوم کشمیری عوام کے ساتھ غیر متزلزل یکجہتی کا اظہار کرتے ہوئے کہا ہے کہ 5 اگست 2019 کا دن کشمیریوں کی شناخت، حقوق اور آئینی حیثیت پر حملہ تھا، جسے پاکستان کبھی تسلیم نہیں کرے گا۔
یومِ استحصالِ کشمیر کے موقع پر اپنے خصوصی پیغام میں وزیر اعلیٰ نے آزادی کی جدوجہد میں جانوں کا نذرانہ پیش کرنے والے شہدا کے اہلِ خانہ کے صبر و استقامت کو خراجِ تحسین پیش کرتے ہوئے کہا کہ پاکستانی قوم کشمیری عوام کے حقِ خودارادیت کی منصفانہ جدوجہد میں ان کے شانہ بشانہ کھڑی ہے اور ہمیشہ کھڑی رہے گی۔
یہ بھی پڑھیں: یوم استحصال کشمیر: 7 برس گزر گئے، مقبوضہ وادی آج بھی پابندیوں، گرفتاریوں اور غیر یقینی مستقبل کی تصویر
وزیراعلیٰ مریم نواز شریف نے کہا کہ مسئلہ کشمیر موجودہ دور کا سب سے بڑا انسانی المیہ ہے، جبکہ مقبوضہ جموں و کشمیر میں بھارتی سامراج کے مظالم نے خطے میں ظلم و جبر کی آگ بھڑکا رکھی ہے۔
انہوں نے کہا کہ آج ’کشمیر بنے گا پاکستان‘ کی صدائیں صرف پاکستان ہی نہیں بلکہ دنیا بھر میں گونج رہی ہیں۔
انہوں نے اقوامِ متحدہ اور انسانی حقوق کی تمام بین الاقوامی تنظیموں سے مطالبہ کیا کہ وہ مقبوضہ جموں و کشمیر میں انسانی حقوق کی سنگین خلاف ورزیوں کا فوری نوٹس لیں اور کشمیری عوام کو ان کا بنیادی حقِ خودارادیت دلانے کے لیے مؤثر کردار ادا کریں۔
مزید پڑھیں: یومِ استحصالِ کشمیر: صدر اور وزیراعظم کا کشمیری عوام کی بھرپور حمایت کا اعلان
وزیراعلیٰ پنجاب نے کہا کہ قائد محمد نواز شریف نے ہمیشہ مسئلہ کشمیر پر دوٹوک اور اصولی مؤقف اختیار کیا، جبکہ پاکستان آئندہ بھی مقبوضہ جموں و کشمیر کے کشمیری بہن بھائیوں کی ہر سطح پر سیاسی، سفارتی اور اخلاقی حمایت جاری رکھے گا۔
انہوں نے اس عزم کا اعادہ کیا کہ کشمیری عوام کی آزادی اور حقِ خودارادیت کی جدوجہد میں پوری پاکستانی قوم ان کے ساتھ ہے اور رہے گی۔
