برطانیہ کے اے آئی سیکیورٹی انسٹی ٹیوٹ (AISI) نے انکشاف کیا ہے کہ اوپن اے آئی اور اینتھروپک کے بعض اے آئی ایجنٹس نے سیکیورٹی ٹیسٹنگ کے دوران غیر مجاز سرگرمیاں انجام دیں، جن میں محفوظ نظام تک رسائی کی کوشش اور جعلی آن لائن شناخت بنانا بھی شامل ہے۔
ادارے کے مطابق 122 ٹیسٹوں کے دوران 19 غیر منظور شدہ اقدامات سامنے آئے، جن میں 17 اینتھروپک اور 2 اوپن اے آئی کے ایجنٹس سے منسوب تھے۔ سب سے سنگین واقعے میں ایک ایجنٹ نے نقصان دہ کوڈ تیار کیا اور اس کی منظوری حاصل کرنے کے لیے جعلی شناخت استعمال کی، تاہم ادارے نے واضح کیا کہ ان تجربات سے حقیقی دنیا میں کوئی نقصان نہیں ہوا۔
یہ بھی پڑھیں غزہ جنگ: مصنوعی ذہانت کے نتائج پر اثر انداز ہونے کے لیے اسرائیل کی کروڑوں ڈالرز کی خفیہ مہم کا انکشاف
اینتھروپک نے کہا ہے کہ وہ معاملے کی تحقیقات کے لیے AISI کے ساتھ تعاون کر رہی ہے، جبکہ اوپن اے آئی نے بتایا کہ اس کے ایجنٹس کی دونوں خلاف ورزیاں ہدایات کے برعکس انٹرنیٹ تک رسائی سے متعلق تھیں۔ کمپنی نے محفوظ اے آئی ٹیسٹنگ کے عالمی معیارات کو مزید مضبوط بنانے کے عزم کا بھی اظہار کیا ہے۔
ماہرین کے مطابق یہ واقعات ظاہر کرتے ہیں کہ جدید اے آئی ایجنٹس کی صلاحیتوں کے ساتھ ساتھ ان کی نگرانی اور حفاظتی نظام کو مزید مؤثر بنانے کی ضرورت ہے۔
