راولپنڈی میں کمیٹی چوک اور لنڈا بازار کے قریب 6 سالہ بچی کے لاپتا ہونے کے بعد ریسکیو حکام نے سرچ اینڈ ریسکیو آپریشن شروع کیا تاہم اندھیرا ہوجانے کے باعث تلاش کل تک ملتوی کردی گئی۔
یہ بھی پڑھیں: راولپنڈی میں گیس لیکج سے گھر میں خوفناک دھماکا، 7 افراد جھلس کر زخمی
ریسکیو حکام کے مطابق ابتدائی اطلاعات کے مطابق بچی کے والد اپنے بچوں کو گاڑی میں بٹھا رہے تھے کہ اسی دوران 6 سالہ بچی اچانک لاپتا ہوگئی۔
حکام کا کہنا ہے کہ خدشہ ظاہر کیا جا رہا ہے کہ بچی قریبی نالے میں گر گئی ہو تاہم ابھی تک اس حوالے سے کوئی حتمی تصدیق نہیں ہوئی اور واقعے کی مختلف پہلوؤں سے تحقیقات جاری ہیں۔
اطلاع ملتے ہی واٹر ریسکیو ٹیمیں موقع پر پہنچ گئیں اور نالے سمیت اطراف کے علاقوں میں سرچ اینڈ ریسکیو آپریشن شروع کر دیا گیا۔
مزید پڑھیے: راولپنڈی جرگہ قتل کیس میں نامزد ملزمان کو نوٹس جاری
ریسکیو حکام کے مطابق پولیس بھی جائے وقوعہ پر موجود ہے اور بچی کی گمشدگی سے متعلق تمام ممکنہ پہلوؤں کا جائزہ لیا جا رہا ہے۔ حکام نے کہا ہے کہ بچی کی تلاش کے لیے آپریشن جاری ہے اور مزید معلومات سامنے آنے پر آگاہ کیا جائے گا۔
سرچ آپریشن کو مزید وسعت دیتے ہوئے ریسکیو حکام نے نالہ لئی کے مختلف حصوں تک کارروائی پھیلا دی ہے۔ ریسکیو کے مطابق ڈرینیج نالے میں ممکنہ طور پر بچی کے گرنے کی جگہ سے لے کر موتی محل پل تک سرچ مکمل کر لی گئی ہے۔
ریسکیو حکام کا کہنا ہے کہ اب تک تقریباً 4 کلومیٹر طویل علاقے میں لائن سرچ مکمل کی جا چکی ہے جبکہ آپریشن میں واٹر ریسکیو ٹیمیں مسلسل حصہ لے رہی ہیں۔
ریسکیو کے مطابق اس وقت واٹر ریسکیو ٹیمیں گوالمنڈی پل کے ڈاؤن اسٹریم میں لائن سرچ اور ایمبینکمنٹ سرچ آپریشن کیا ہے تاکہ لاپتا بچی کا سراغ لگایا جا سکے۔ ساتھ ہی پولیس بھی واقعے کی مختلف پہلوؤں سے تحقیقات کر رہی ہے۔
بچی کے والد کا نام عمیر علی ہے جو لنڈا بازار میں کسی کے گھر دعوت پر آئے تھے۔ بچی رات ڈھائی بجے گم ہو گئی۔
مزید پڑھیں: راولپنڈی دوہرے قتل کیس میں اہم پیشرفت، زین شاہ پر بہیمانہ تشدد کی تصدیق
ریسکیو عملے کا کہنا ہے کہ فی الحال اندھیرے کی وجہ سے سرچ آپریشن روک دیا گیا اور بچی کی تلاش جمعے کو دوبارہ شروع کی جائے گی۔
