برطانیہ کے دارالحکومت لندن کے علاقے کووینٹ گارڈن میں 4 افراد کو چاقو کے وار سے زخمی کرنے کے الزام میں 47 سالہ خاتون پر فرد جرم عائد کردی گئی۔
میٹروپولیٹن پولیس کے مطابق اسٹیلا گولووینا کو بدھ کے روز حراست میں لیا گیا تھا، جس کے بعد اس پر شدید نوعیت کے جسمانی نقصان پہنچانے کے ارادے سے زخمی کرنے کے 4 مقدمات اور عوامی مقام پر غیر قانونی طور پر ہتھیار رکھنے کا ایک مقدمہ درج کیا گیا ہے۔
یہ بھی پڑھیں: لندن جانے والی ٹرین میں چاقو حملہ، 10 افراد زخمی، 2 گرفتار
پولیس کا کہنا ہے کہ ابتدائی تحقیقات کے مطابق یہ واقعہ ممکنہ طور پر ذہنی صحت سے متعلق مسئلہ ہوسکتا ہے۔
View this post on Instagram
حکام کے مطابق واقعے کی اطلاع ملتے ہی بدھ کو دوپہر تقریباً 12:30 بجے پولیس موقع پر پہنچ گئی اور تحقیقات شروع کردیں۔ حملے میں زخمی ہونے والے 4 افراد کی عمریں 34، 39، 42 اور 52 سال ہیں۔
پولیس کے مطابق زخمی افراد کو فوری طبی امداد کے لیے اسپتال منتقل کیا گیا، تاہم اب ان کی حالت خطرے سے باہر ہے اور انہیں اسپتال سے فارغ کردیا گیا ہے۔
یہ بھی پڑھیں: چاقو حملے کے بعد شمالی آئرلینڈ میں پرتشدد مظاہرے، متعدد خاندان بے گھر
اسٹیلا گولووینا کو جائے وقوعہ سے ہی گرفتار کرلیا گیا تھا اور اسے بعد ازاں حراست میں لے لیا گیا۔ ملزمہ کو جمعرات کو ہائیبری مجسٹریٹس کورٹ میں پیش کیا جائے گا۔
واقعے کے بعد لندن کی فضائی ایمبولینس بھی ٹریفالگر اسکوائر پہنچی، تاہم زخمیوں کو موقع پر موجود طبی عملے نے ابتدائی طبی امداد فراہم کی اور بعد میں سڑک کے راستے اسپتال منتقل کیا گیا۔
