۔
۔
کوالالمپور سے بھارت کے شہر کوچی آنے والی ایک نجی ایئرلائن کی پرواز میں دورانِ سفر اس وقت شدید خوف و ہراس پھیل گیا جب ایک مسافر نے لینڈنگ سے کچھ دیر قبل جہاز کا ایمرجنسی دروازہ کھولنے اور اس کا پینل توڑنے کی کوشش کی۔ تاہم، فلائٹ اٹینڈنٹس اور دیگر مسافروں نے بروقت اقدام کرتے ہوئے ملزم کو قابو کر لیا۔
ذرائع کے مطابق یہ واقعہ باتک ایئر کی پرواز ‘او ڈی 231’ میں پیش آیا۔ ملزم کی شناخت ریاست کیرالہ کے ضلع پالاکاڈ سے تعلق رکھنے والے 34 سالہ جمشیر اتھانیکل کے نام سے ہوئی ہے۔
ایف آئی آر کے مطابق دورانِ پرواز ملزم نے اچانک نامناسب رویہ اختیار کیا، ایمرجنسی ایگزٹ کی کھڑکی کا پینل توڑ دیا اور زور زبردستی سے ایمرجنسی دروازہ کھولنے کی کوشش کی۔ اس کے علاوہ اس نے منع کرنے پر عملے کے ارکان اور دیگر مسافروں کو دھمکیاں بھی دیں۔
طیارے کی لینڈنگ کے فوراً بعد سنٹرل انڈسٹریل سیکیورٹی فورس (CISF) کے اہلکاروں نے ملزم کو تحویل میں لے کر مقامی پولیس (نیدومباسیری تھانہ) کے حوالے کر دیا۔
پولیس نے ایئرلائن کی سیکیورٹی ٹیم کی شکایت پر ملزم کے خلاف بھارتیہ نیا ئے سنہیتا (BNS)، ایئرکرافٹ ایکٹ اور کیرالہ پولیس ایکٹ کی متعدد دفعات کے تحت پرواز کی حفاظت کو خطرے میں ڈالنے، املاک کو نقصان پہنچانے اور مجرمانہ دھمکیاں دینے کا مقدمہ درج کر کے قانونی کارروائی کا آغاز کر دیا ہے۔
